საქართველოში ამერიკის შეერთებული შტატების ელჩმა, კელი დეგნანმა 9 აპრილსა და რუსეთის შეჭრის შემდეგ, უკრაინაში ომში დაღუპულ ქართველებს პატივი მიაგო. საელჩოს განცხადებით, საქართველოში რუსეთის აგრესიას განსაკუთრებული სიმძაფრით განიცდიან, რადგან ხალხს რუსთთან ოკუპაციის ისტორია ახსოვს.

"საქართველოში განსაკუთრებული სიმძაფრით განიცდიან რუსეთის მიერ წინასწარგანზრახულ და არაპროვოცირებულ ომს უკრაინაში, ვინაიდან ხალხს კარგად ახსოვს გატეხილი პირობების, ძალადობისა და ოკუპაციის ისტორია რუსეთთან. ამის გამოა, რომ ათობით ათასი ადამიანი გამოდის აქციებზე, აგროვებს ჰუმანიტარულ დახმარებას, მასპინძლობს და გვერდში უდგას უკრაინელ ლტოლვილებს. სამწუხაროდ, რუსული არმიის სისასტიკე საუკუნეებს ითვლის და აგრესორი მეზობლის ხელით საქართველოს თავისი წილი კოშმარი აქვს გამოვლილი", — ნათქვამია საელჩოს განცხადებაში.

მათივე თქმით, მიუხედავად იმისა, რომ 1989 წლის 9 აპრილს, საბჭოთა ძალების მიერ დამოუკიდებლობის მხარდამჭერ დემონსტრანტებზე თავდასხმა და მწარე მოგონებად დარჩება, ეს დღე რუსული სისასტიკის სიმბოლო მაინც არასდროს იქნება.

"ვინაიდან 9 აპრილი ეკუთვნით ქართველებს, რომლებმაც თავისი ქვეყნის თავისუფლების სურვილით არნახული სიმამაცე გამოიჩინეს და საქართველოს დამოუკიდებლობისკენ გაუკვალეს გზა", — ვკითხულობთ განცხადებაში.

1989 წლის 9 აპრილიდან 33 წელი გავიდა. 9 აპრილის ღამეს საბჭოთა ძალამ 20 ადამიანის სიცოცხლე შეიწირა. კიდევ ერთი იმავე დღეს, კომენდანტის საათის გამოცხადების შემდეგ ცეცხლსასროლი იარაღით მოკლეს.