ნაციონალური მოძრაობის წევრი, კოტე იოსელიანი ამბობს, რომ პარლამენტარი და ქართული ოცნების წევრი, ირაკლი სესიაშვილი იტყუებოდა, როცა თავისი შვილის შესახებ საუბრობდა.

"ირაკლი სესიაშვილმა დაადასტურა და აღიარა ის ყველაფერი, რასაც გუშინ საერთოდ გამორიცხავდა. აქვე უნდა ვისაუბროთ იმაზე, რომ დანაშაულის ადგილიდან ამოღებული თითის ანაბეჭდები ნამდვილად ეკუთვნის დავით სესიაშვილს [დეპუტატის შვილი]. ირაკლი სესიაშვილი უტიფრად იტყუება, რომ მის შვილს არასოდეს შემხებლობა არ ჰქონია სამართალდამცავ სტრუქტურებთან და თურმე პოლიციის შენობაშიც არ ყოფილა ნამყოფი არასოდეს. დღეს გამოვლინდა, რო ნამყოფიც არის და გარკვეული კომუნიკაციაც გააჩნდათ მათთან," - განაცხადა ნაციონალური მოძრაობის წევრმა.

სწორედ ამ წევრმა, კოტე იოსელიანმა გუშინ პრესკონფერენცია გამართა, სადაც აღნიშნა, რომ მთავარი პროკურორის ჩარევით საქართველოს პარლამენტის დეპუტატის, ირაკლი სესიაშვილის შვილის, დავით სესიაშვილის დანაშაულებრივი საქმე მიიჩქმალა.

დღეს, ირაკლის სესიაშვილმა განაცხადა, რომ მისი შვილის, დავით სესიაშვილის ანაბეჭდები მისი მეგობრის გაძარცვულ მანქანაშია აღმოჩენილი და ნაციონალურმა მოძრაობამ არასწორი ინფორმაცია გაავრცელა.