კანადის საგარეო საქმეთა მინისტრი, მელანი ჯოლი აცხადებს, რომ საქართველო ახლა ზეწოლის ქვეშაა, მოწყვლადია, ამიტომ მის გვერდით უნდა იყვნენ. ჯოლის თქმით, რაც ახლა უკრაინაში ხდება, შესაძლოა სხვა ქვეყნებშიც მოხდეს, ამიტომ კანადა NATO-ს სხვა წევრებთან ერთად უნდა გააქტიურდეს.

"მხარს ვუჭერთ საქართველოს, ჩვენ მჭიდრო მეგობრობა გვაკავშირებს. ჩვენ ყოველთვის ვუჭერდით მხარს NATO-ს ღია კარის პოლიტიკას. ვიცით, რომ საქართველო ახლა დიდი ზეწოლის ქვეშაა და მეტად მოწყვლადია, სწორედ ამიტომ ვფიქრობ, რომ ჩვენ პარტნიორების გვერდით უნდა ვიყოთ, რადგან, რა თქმა უნდა, ჩვენ ვიცით, რომ რაც ახლა უკრაინაში ხდება, შესაძლოა, პოტენციურად სხვა ქვეყნებში მოხდეს. კანადამ უნდა შეასრულოს საკუთარი როლი და გააქტიურდეს NATO-ს სხვა წევრებთან ერთად", — განაცხადა მან.

დღეს ბრიუსელში NATO-ს მინისტერიალი შედგა. ბრიუსელში იმყოფება საქართველოს საგარეო საქმეთა მინისტრი, ილია დარჩიაშვილიც.