რუსი პოლიტიკოსი ვლადიმერ ჟირინოვსკი მართლა მოკვდა. ამჯერად ინფორმაცია რუსეთის დუმის სპიკერზე, დუმის ოფიციალურ ვებგვერდზე, ჟირინოვსკის პარტიის ტელეგრამსა და არაერთ მედიაზე, მათ შორის, BBC-ის რუსულ ბიუროზე გავრცელდა.

ამ ინფორმაციის სანდოობაში მედიას არწმუნებს ისიც, რომ წინა შემთხვევებში ჟირინოვსკის სიკვდილი სწორედ დუმის სპიკერმა, ვიაჩოსლავ ვოლოდინმა უარყო და ყველა ფეიკების გავრცელებაში დაადანაშაულა. ახლა კი მან ტელეგრამზე დაწერა, რომ ჟირინოვსკი მძიმე დაავადების შემდეგ გარდაიცვალა.

"ნათელი, ნიჭიერი პოლიტიკოსი. ადამიანი, რომელსაც ღრმად ესმოდა როგორ მუშაობს სამყარო და ბევრი რამ იწინასწარმეტყველა. სახელმწიფო სათათბიროს LDPR ფრაქციის ლიდერი. ის მუდამ მოვლენების ეპიცენტრში იყო. მისი პიროვნება იმდენად მასშტაბურია, რომ მის გარეშე ძნელი წარმოსადგენია თანამედროვე რუსეთის პოლიტიკური სისტემის განვითარების ისტორია", — ასე ახასიათებს ვოლოდინი ჟირინოვსკის, რომელსაც მსოფლიო მედია, ისევე, როგორც რუსეთის საზოგადოების ნაწილი პოლიტიკურ კლოუნს უწოდებდა.

ჟირინოვსკის სიკვდილზე განცხადება გამოქვეყნდა დუმის ოფიციალურ ვებგვერდზეც, სადაც აღნიშნულია, რომ დეპუტატებმა "მის ხსოვნას პატივი მიაგეს".

ფოტო: კადრი დუმის ვებგვერდიდან

მოგვიანებით, დუმის ვებგვერდზე ვიპოვეთ ამის ამსახველი ვიდეოც.

ჟირინოვსკის სიკვდილზე წერენ და პოლიტიკოს აქებენ პარტიის ტელეგრამ არხზე გამოქვეყნებულ განცხადებაშიც:

"დღეს დიდხნიანი ავადმყოფობის შემდეგ, გარდაიცვალა ლიბერალ-დემოკრატიული პარტიის თავმჯდომარე ვლადიმერ ვოლფოვიჩ ჟირინოვსკი. ეს არის დარტყმა მთელი რუსეთისთვის, მისი მომხრეების არმიისთვის.

გაზვიადების გარეშე გარდაიცვალა დიდი კაცი, მან ჩაიწერა ჩვენი ქვეყნის და მთელი მსოფლიოს ისტორიაში. ჩვენ ყველანი ვგლოვობთ".

ჟირინოვსკის სიკვდილზე ინფორმაცია არაერთხელ გავრცელდა და ამდენჯერვე უარყვეს. თავდაპირველად ამბები დაბალი ხარისხის, ნაკლებად სანდო მედიებზე ვრცელდებოდა, მაგრამ ბოლო შემთხვევაში, ჟირინოვსკის სიკვდილზე დაწერეს სანდო მედიებმაც, ვინაიდან მაშინ ინფორმაცია რუსმა სენატორმა გაავრცელა. თუმცა, მოვლენები მაშინაც უარყოფით გაგრძელდა და რუსულ მედიას გამოქვეყნებული სტატიების წაშლა და ჩასწორება მოუწია.