როდესაც ინგლისურიდან, უკრაინულიდან, უზბეკურიდან თუ რომელიმე სხვა ენიდან სიტყვის ან წინადადების გადმოთარგმნა გვინდა, ან პირიქით, ვცდილობთ ქართული სიტყვის მნიშვნელობა მოვძებნოთ ამ ენებზე, Google Translate ერთ-ერთი ყველაზე მოსახერხებელი ხელსაწყოა. თუმცა, ამ პლატფორმას ერთი შემაწუხებელი ნაკლი მაინც აქვს — ენის გადართვისას Gboard-ზე კლავიატურის ენა არ იცვლება. ანუ, მაგალითად, თუ ჯერ ინგლისურიდან თარგმნით რამეს, ამ ენის ქართულით შეცვლისას ტექსტის ადგილას არა, ვთქვათ, "ნუშის ნამცხვარი", არამედ "nuSis namcxvari" გამოჩნდება. Google Translate-ის განახლება კი ამ პრობლემას საბოლოოდ გადაჭრის.

9to5Google-ის მიხედვით, Google Translate Android-ზე განახლებას ამატებს, რომლის საშუალებითაც ვირტუალური კლავიატურის — Gboard-ის ენა, მითითებული სათარგმნი ენის შეცვლისას ავტომატურად შეიცვლება. ასევე, მაგალითად, თუ ინგლისურის ნაცვლად Translate from-თან არაბულს აირჩევთ, Gboard ასე შეიცვლება:

ფოტო: Android Police

აღსანიშნავია ისიც, რომ აპლიკაციიდან გამოსვლის შემდეგ Gboard ისევ საწყის ენას დაუბრუნდება და მისი შეცვლა არ მოგიწევთ. აქამდე, თუ რომელიმე სხვა ენაზე გინდოდათ Gboard-ის გადართვა, მისი პარამეტრებიდან შესაბამისი კლავიატურა უნდა გადმოგეტვირთათ. ახლა ეს საჭირო აღარ იქნება, რაც საქმეს ბევრად ამარტივებს.

ეს ფუნქცია უკვე ხელმისაწვდომია Google Translate-ის 6.33 ვერსიაზე და Gboard-ის მიმდინარე სტაბილურ გამოშვებასთან თავსებადია.