პრემიერმინინსტრმა, ირაკლი ღარიბაშვილმა დავით ზალკალიანი საგარეო საქმეთა მინისტრობიდან გადააყენა და ამერიკის შეერთებულ შტატებში საქართველოს ელჩად დანიშნა.

"მთავრობის შემადგენლობაში ჩვენ კიდევ ერთი ცვლილება განვახორციელეთ და ამის თაობაზე მინდა ვაცნობო საზოგადოებას. ვიცე-პრემიერი და საგარეო საქმეთა მინისტრი, ბატონი დავით ზალკალიანი დაინიშნა საქართველოს საგანგებო და სრულუფლებიან ელჩად ამერიკის შეერთებულ შტატებში.

მე მინდა, პირველ რიგში, ბატონ დავითს დიდი მადლობა გადავუხადო გაწეული საქმიანობისთვის. ბატონ დავითს აქვს უზარმაზარი გამოცდილება, 30 წელი ემსახურება ჩვენს ქვეყანს, მის მშობლიურ უწყებას, საგარეო საქმეთა სამინისტროს, სხვადასხვა თანამდებობაზე", — განაცხადა ღარიბაშვილმა.

პრემიერმინისტრის თქმით, აშშ საქართველოსთვის ყველაზე მნიშვნელოვანი პარტნიორია და ელჩად ზალკალიანის დანიშვნით "ყველაფერი არის ნათქვამი".

"აშშ არის ჩვენთვის ყველაზე მნიშვნელოვანი სტრატეგიული პარტნიორი და ბუნებრივია, როცა ჩვენი მთავრობა ასეთ თანამდებობაზე, ასეთ საპასუხისმგებლო თანამდებობაზე ნიშნავს ასეთი მდიდარი დიპლომატიური გამოცდილების მქონე კადრს, ამით ყველაფერი არის ნათქვამი. ჩვენი ამოცანა, ჩვენი სურვილი არის კიდევ უფრო სხვა ნიშნულზე გადავიყანოთ ორ ქვეყანას შორის არსებული ურთიერთობა", — განაცხადა მან.

ღარიბაშვილმა ახალ საგარეო საქმეთა მინისტრად მთავრობის ადმინისტრაციის ყოფილი უფროსი ილია დარჩიაშვილი დანიშნა.