ცენტრალური საარჩევნო კომისიის წინასწარი მონაცემებით, ბათუმში ქართული ოცნების კანდიდატი რამაზ ჯინჭარაძე ლიდერობს.

ცესკოს ცნობით, ბათუმის თოთხმეტივე უბნის წინასწარი პირველადი მონაცემები არის შემდეგი:

  • მათე ფუტკარაძე — 31%;
  • რამაზ ჯინჭარაძე — 69%.

მათივე განცხადებით, ბათუმის თოთხმეტივე საარჩევნო უბანზე კომისიის წევრები ბიულეტენებს კანონმდებლობით დადგენილი წესით დაითვლიან და სწორედ ეს იქნება იურიდიული ძალის მქონე მონაცემები. ასევე, განხორციელდება აღნიშნული პროცესის ფოტო-ვიდეო გადაღება.

"რაც შეეხება აქტივობას, დღეს საარჩევნო უბანზე სულ 52 139 ამომრჩეველი მივიდა, ეს გახლავთ 31,8%, მათ შორის ბათუმში 10 578 ამომრჩეველი, ეს არის 51,3%, ხოლო რუსთავსა და გარდაბანში 40 559 ამომრჩეველი მივიდა, რაც გახლავთ ამომრჩეველთა 29%. შუალედური არჩევნები შედგა. კენჭისყრა მშვიდ და გამჭვირვალე გარემოში წარიმართა. საარჩევნო უბნებზე უზრუნველყოფილი იყო ყველასათვის ხელმისაწვდომი და ჯანმრთელობისთვის უსაფრთხო გარემო", — აცხადებენ ცესკოში.

რუსთავსა და ბათუმში შუალედური არჩევნები გაიმართა. ამომრჩევლებმა რუსთავში საქართველოს პარლამენტის, ხოლო ბათუმში საკრებულოს მაჟორიტარს აირჩიეს. არჩევნებისთვის რუსთავსა და გარდაბანში 117, ხოლო ბათუმში 14 საარჩევნო უბანი იყო გახსნილი.

ბათუმში საკრებულოს ახალი მაჟორიტარი წევრის არჩევა მას შემდეგ გახდა საჭირო, რაც ნაციონალური მოძრაობიდან საკრებულოს წევრი, ნუგზარ ფუტკარაძე გარდაიცვალა. ენმ-მა მის გარდაცვალებაში ქართული ოცნება დაადანაშაულა. პარტიაში აცხადებენ, რომ ფუტკარაძეზე აჭარის მთავრობის თავმჯდომარის, თორნიკე რიჟვაძის მამა, ძალოვანი უწყების მოქმედი მაღალჩინოსანი, დავით რიჟვაძე ზეწოლას ახდენდა.

რაც შეეხება რუსთავს, პარლამენტის მაჟორიტარი დეპუტატის ასარჩევად, არჩევნების ჩატარება აუცილებელი გახდა, რადგან ქართული ოცნების წარმომადგენელი, ნინო ლაცაბიძე რუსთავის მერად აირჩიეს.