ქართული ოცნების დეპუტატი რატი იონათამიშვილი აცხადებს, რომ ოკუპირებული ცხინვალის "რეფერენდუმი" პროვოკაციაა და ამაზე ეფექტური რეაქცია საერრთაშორისო პლატფორმების გამოყენება და დასავლელ პარტნიორებთან აქტიური კომუნიკაციაა.

"არ აქვს მნიშვნელობა ამ პროვოკაციას აქვს ის მიზანი, რომ შიგნით პოლიტიკურ პროცესებში მოიპოვოს წარმატება, თუ ზოგადად ეს არის ოკუპაციური ტაქტიკა. რასაკვირველია, ნებისმიერ შემთხვევაში ეს არის პროვოკაცია და ჩვენი ყველაზე ეფექტური რეაქცია ამასთან დაკავშირებით არის აქტიური გამოყენება ყველა საერთაშორისო პლატფორმის და აქტიური კომუნიკაცია ჩვენს დასავლელ პარტნიორებთან, რომ ნებისმიერი პროვოკაციის შესაბამისი შეფასება მოხდეს საერთაშორისო საზოგადოების მხრიდან", — ამბობს ის TV პირველთან.

მას შემდეგ, რაც საქართველოს ოკუპირებული რეგიონის დე ფაქტო პრეზიდენტმა, ანატოლი ბიბილოვმა განაცხადა, რომ რუსეთთან შეერთებისთვის მალე ზომებს მიიღებდა, მათ ოფიციალურ გვერდზე პროპაგანდისტული შინაარსის სხვადასხვა განცხადება გავრცელდა, მათ შორის, იმაზე, რომ რუსეთთან გაერთიანებაზე რეფერენდუმი დაიგეგმება. ე.წ. რეფერენდუმი რუსეთისთვის ნაცადი ხერხია — იგივე მეთოდები გამოიყენეს უკრაინაში, როდესაც ანექსირებული ყირიმი რუსეთის ნაწილად გამოაცხადეს.

ე.წ. სახელმწიფო სააგენტო რესზე გამოქვეყნდა პარლამენტის სპიკერისა და ე.წ. პრეზიდენტის პრესსპიკერის განცხადებები. პარლამენტის სპიკერის თქმით, ე.წ. რეფერენდუმი უახლოეს მომავალში ჩატარდება და რუსეთთან შეერთებაზე ხალხი საკუთარ აზრს გამოთქვამს. მისივე განცხადებით, არანაირი სამართლებრივი წინააღმდეგობა არ არსებობს, რომ საქართველოს ოკუპირებული რეგიონი რუსეთს შეუერთდეს.