როგორც იცით, კინოსტუდია Universal, პოპის დედოფლის, მადონას შესახებ მხატვრული ფილმის გადაღებას აპირებს, თუმცა ამ ამბავს მოწინააღმდეგეები უკვე გამოუჩნდნენ, მათ შორის არის თავად მადონაც, რომელიც კინოსტუდიას ამ გადაწყვეტილების გამო კიცხავს.

"არავინ იცის ის, რაც მე ვიცი და რაც მე მინახავს, მხოლოდ მე შემიძლია მოვყვე ჩემი ისტორია, ყველა დანარჩენი ვინც ამას ეცდება არის შარლატანი და სულელი", - ამბობს მადონა.

ფილმის სცენარზე მუშაობა 2016 წელს დაიწყო და ის მადონას კარიერის საწყის ეტაპზე მოგვითხრობს, როდესაც მომღერალი ამერიკულ შოუ-ბიზნესში საკუთარი ადგილის დაკავებას ცდილობდა. სწორედ იმ პერიოდზე, როდესაც მან ყველაზე ცნობილი ჰიტები ჩაწერა და წარმატების გზას დაადგა, ხოლო თინეიჯერი გოგონები მისი ჩაცმის სტილის გავლენის ქვეშ მოექცნენ, რაც საბოლოოდ 80-იან წლებში ქალების მოდის განმსაზღვრელი გახდა.

ჯერ-ჯერობით უცნობია როდის გამოვა ფილმი ეკრანებზე, თუმცა, როგორც ცნობილია, მისი პროდიუსერი მაიკლ დე ლუკაა, რომელიც წელს ოსკარის ცერემონიალის პროდიუსერიც იყო.