პრემიერმინისტრი, ირაკლი ღარიბაშვილი აცხადებს, რომ საწვავზე გაზრდილი ფასების პროტესტის უკან ნაციონალური მოძრაობა დგას. მისი თქმით, ყველა დაინტერესებულია იმით, რომ მოქალაქეებს გაზრდილი ფასებით გამოწვეული წნეხი შეუმსუბუქონ.

"ასევე, მინდა რამდენიმე საკითხზე გავაკეთო კომენტარი. პირველი ეხება, ზოგადად, ფასებს, ინფლაციას და ასევე, მინდა შევეხო საკითხს, რომელიც უკავშირდება საწვავის ფასებს. გუშინ ჩვენ ვნახეთ, რომ გარკვეული აქციები იქნა ორგანიზებული, რომლის უკან იდგა, პირდაპირ უნდა ითქვას, რომ ნაციონალური მოძრაობა. მე მესმის, რომ ჩვენს მოქალაქეებს ძალიან აწუხებთ ფასები და რა თქმა უნდა, ჩვენ ყველანი ვართ დაინტერესებული იმისთვის, რომ რაც შეიძლება, შევუმსუბუქოთ ჩვენს მოქალაქეებს გაზრდილი ფასები და წნეხი, რომელიც მომდინარეობს ამ კრიზისებიდან", — განაცხადა ღარიბაშვილმა.

27 მარტს თბილისში აქცია გაიმართა, სადაც მოქალაქეები საწვავის ფასების გაზრდას აპროტესტებდნენ. აქციაზე 20 ადამიანი დააკავეს.