სუმის რეგიონში მცხოვრებმა 6 წლის უკრაინელმა ბიჭმა გადაწყვიტა, თავის დაბადების დღეზე საჩუქრად მიღებული დრონი ქვეყნის სამხედრო ძალებისთვის გადაეცა. ამბავს ტელეგრამის არხზე რადას საგანმანათლებლო ცენტრი ავრცელებს.

"ეს პატარა კაზაკი კროლევეციდან დიდი ხანია, კვადკოპტერზე ოცნებობდა. მამამისმაც გადაწყვიტა, დრონი დაბადების დღისთვის ეჩუქებინა", — წერია გავრცელებულ ინფორმაციაში, — "თუმცა, როგორც კი ბიჭმა გაიგო, რომ უკრაინის სამხედრო ძალებს ასეთი დრონი სჭირდებოდათ, მაშინვე მოისურვა, ის გაეჩუქებინა".

"მა, მოდი, ეს სამხედროებს ვაჩუქოთ. მათ უფრო სჭირდებათ. ისინი ხომ გვიცავენ", — უთხრა ბიჭმა მამას.

ეს ამბავი პატარა უკრაინელების გმირობის პირველი შემთხვევა არ არის. ჩვენ ხომ უკვე გავიცანით 11 წლის ბიჭი, რომელიც სლოვაკეთში მარტო ჩავიდა.

სამწუხაროდ, უკრაინაში მიმდინარე ომმა ასზე მეტი ბავშვის სიცოცხლე შეიწირა. ასამდე მოზარდიც დაშავებულია. აფეთქებებში ჩაკარგული მათი ხმების მსოფლიომდე მისაწვდენად და დახმარების სათხოვნელად ცნობილმა უკრაინელებმა ცოტა ხნის წინ სოციალურ მედიაში კამპანიაც წამოიწყეს.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში