რუსეთის უკრაინაში შეჭრიდან და სრულმასშტაბიანი ომის დაწყებიდან 3 კვირაზე მეტი გავიდა. ამ ხნის განმავლობაში ასობით უკრაინელი, მათ შორის, ასზე მეტი ბავშვი დაიღუპა, მილიონობით მცხოვრებმა კი საკუთარი სახლი დაკარგა. ომის გამო რუსეთისთვის დაწესებული უამრავი სანქციის შედეგმაც არ დააყოვნა — Bloomberg-ის ცნობით, სამხედრო კონფლიქტის დაწყებიდან ორ კვირაში რუსეთის მთლიანი შიდა პროდუქტი $30 მილიარდზე მეტით შემცირდა.

თუმცა, სანქციების შედეგები თუ ვინმემ იწვნია საკუთარ თავზე, ყველაზე ნაკლებად — ალბათ მთავრობასთან დაახლოებულმა რუსმა ოლიგარქებმა. ქვეყნის ეკონომიკაზე მიყენებული დარტყმით აღელვებული არც პუტინი ჩანდა, როცა 18 მარტს, ლუჟნიკის სტადიონზე გამართულ მასშტაბურ კონცერტზე გამოჩნდა და თავისი ომის გამართლება წმინდა წერილის ციტატის მოხმობით სცადა.

თუ ვინმე პუტინის "შთამაგონებელი" სიტყვით გულაჩუყებული არ დარჩა, მან ტელეგრამს მიაშურა და პრეზიდენტის ქურთუკის ფასით დაინტერესდა.

საქმე ისაა, რომ კონცერტზე გამოსვლისას პუტინს Loro Piana-ის ქურთუკი ეცვა, რომლის ღირებულებაც ონლაინმაღაზიის მონაცემებით, მილიონ-ნახევარ რუსულ რუბლს (დაახლოებით, $14 ათასს) აღწევს.

ქურთუკი პუტინის საყვარელ იტალიურ ბრენდად მიჩნეული Loro Piana-ის 2021/2022 წლების ახალი კოლექციიდანაა. თუმცა, როგორც ჩანს, რუსეთის პრეზიდენტი ომის გასამართლებელი ციტატების ძებნით ისე იყო გართული, ის ამბავიც გამორჩენია, Loro Piana რომ ღიად უჭერს უკრაინას მხარს და მეტიც — პუტინის აგრესიის მსხვერპლი ქვეყნის დასახმარებლად 5 მილიონი ევრო გადარიცხა.

აღსანიშნავია, რომ Loro Piana-ს უკრაინაში 150 თანამშრომელი ჰყავს და ბრენდმა ომის დაწყებიდან მალევე თავისი პოზიცია ღიად დააფიქსირა ინსტაგრამგვერდზე გამოქვეყნებულ სთორიში.

დაკარგული მილიარდების ფონზე მილიონიანი ქურთუკის ჩაცმის გამო კი გაკიცხეს პუტინი, მაგრამ კრემლის პოლიტიკის აქტიურმა მხარდამჭერებმა მოსკოვში გამართულ კონცერტზე საქებარი სიტყვები მაინც არ დაიშურეს. მარგარიტა სიმონიანთან და მარია ზახაროვასთან ერთად, ღონისძიებას არც თინა კანდელაკი გამოკლებია და სტადიონზე შეკრებილებს ომახიანად შესძახა, "რუსეთს ვერ დააჩოქებენო".

დაუჩოქებელი რუსეთის პრეზიდენტის ახალი ქურთუკის რიგიანად შეთვალიერება კი ტელემაყურებლებმა მაინც ვერ შეძლეს — პუტინის შუა გამოსვლის დროს ტრანსლაცია გაწყდა და კონცერტით გაგრძელდა.

ასევე იხილეთ: