ტოლერანტობისა და მრავალფეროვნების ინსტიტუტი შინაგან საქმეთა სამინისტროს აქტივისტ სამირა ბაირამოვასა და სხვა აქტივისტების მიმართ მუქარის ფაქტების დაუყოვნებლივი გამოძიებისკენ მოუწოდებს.

"ბოლო დღეებში ფაშისტურმა დაჯგუფებამ მუქარის გზავნილები გააჟღერა სხვა რეგიონებში მცხოვრები მოქალაქეების და აქტივისტების მიმართაც, ვინც მათ მიერ საქართველოს სხვადასხვა ქალაქში ოფისების გახსნა გააპროტესტა, მათ შორის ხულოში, მესტიაში, ოზურგეთში, ქობულეთში და სხვა რეგიონებში", — ამბობენ ისინი.

მათი განცხადებით, ძალადობრივი, პრორუსული და ჰომოფობიური ალტ-ინფოს პარტიის წევრები 5 ივლისის ძალადობის ორგანიზატორები არიან და მათ მიერ გაგზავნილი მუქარა რეალური საფრთხის შემცველია. ამასთან, TDI აღნიშნავს, რომ პოლიტიკური პარტიის ფორმით დარეგისტირებული დაჯგუფება საქართველოში რუსეთის აგრესიული პროპაგანდის ინსტრუმენტია.

"დაჯგუფების მიერ 2021 წლის 5-6 ივლისს მოწყობილი მასშტაბური ძალადობა სამოქალაქო საზოგადოებაზე და მედიაზე ფაქტობრივად დაუსჯელი დარჩა. არ დამდგარა მასობრივი ძალადობის არცერთი ორგანიზატორის პასუხისმგებლობის საკითხი. უფრო მეტიც, 5 ივლისის მოვლენების შემდეგ, კრიმინალურ დაჯგუფებას არავითარი დაბრკოლება არ შეჰქმნია, დაეფუძნებინა პოლიტიკური პარტია და ოფისები გაეხსნა საქართველოს ყველა რეგიონში", — ნათქვამია განცხადებაში.

გარდა ამისა, ორგანიზაცია ხელისუფლებას მოუწოდებს, აღკვეთოს ალტ-ინფოს საქმიანობა და მისი ლიდერები სისხლის სამართლებრივ პასუხისგებაში მისცენ.

აქტივისტ, რომელმაც მარნეულში ალტ-ინფოს ოფისზე ბანერი უკრაინისა და ევროკავშირის დროშის ფერებში შეღება სიცოცხლის მოსპობით ემუქრებიან. შინაგან საქმეთა სამინისტროს მომხდარზე გამოძიება დაწყებული აქვს.