სოფლის მეურნეობის მინისტრის პირველი მოადგილის, გიორგი ხანიშვილის განცხადებით, საკმარისი მარაგები არსებობს იმისთვის, რათა ქვეყანა უწყვეტ რეჟიმში მომარაგდეს პურით. ამის შესახებ მან სოფლის მეურნეობის მინისტრთან და პურისა და პურპროდუქტების მსხვილ მწარმოებლებთან შეხვედრისას განაცხადა.

"მნიშვნელოვანია აღინიშნოს, რომ არსებობს საკმარისი მარაგები, რათა უწყვეტ რეჟიმში მომარაგდეს ქვეყანა პურით. თითოეული მწარმოებელი აქტიურად მუშაობს იმპორტიორებთან, აქვთ გრძელვადიანი კონტრაქტები. ქვეყანაში, სამომხმარებლო ბაზარი სტაბილურად მარაგდება პურით, ასევე შეუფერხებლად მუშაობენ წისქვილები და არანაირი შეფერხება ამ მიმართულებით არ გვექნება", — თქვა მან.

უწყების ცნობით, შეხვედრაზე მწარმოებლებმა აღნიშნეს, რომ საცხობებში ფქვილის 14-20 დღის მარაგი ყოველთვის არის, ეს კი ბაზარზე პროდუტრის სტაბილურად და შეუფერხებლად მიწოდებას უზრუნველყოფს. პურის მწარმოებელთა ასოციაციის თავმჯდომარე, მალხაზ დოლიძემ კი თქვა, რომ ლარსის საბაჟო პუნქტზე დიდთოვლობის გამო გარკვეული შეფერხება იყო, თუმცა დღეისთვის ეს პრობლემა გადაჭრილია.

"ლარსიდან ტვირთების შემოტანა უკვე განახლდა, შესაბამისად, ხორბლისა და ფქვილის მარაგების შევსების კუთხით ქვეყანაში პრობლემა არ არსებობს. მინდა დავამშვიდო ჩვენი მოქალაქეები, რომ პურის წარმოება და მიწოდება შეუფერხებლად განხორციელდება. დიდი წარმოებები ფქვილის მარაგებით უზრუნველყოფილი არიან. არსებული მარაგების შესახებ ინფორმაციას სამინისტროს ინტენსიურად ვაწვდით", — თქვა მან.