უკრაინაში მიმდინარე მოვლენების საპასუხოდ, The Volkswagen Group-მა, რომლის ერთ-ერთი ბრენდი პორშეა, რუსული ბაზარი დატოვა. კომპანიის ოფიციალურ განცხადებაში წერია, რომ იმედს იტოვებენ, მდგომარეობა დიპლომატიურ ჩარჩოებს დაუბრუნდება და საერთაშორისო სამართლის საფუძველზე გადაწყდება.

ფოტო: თეგეტა მოტორსი

როგორ აისახება უკრაინაში განვითარებული მოვლენები და რუსეთისათვის დაწესებული სანქციები ავტოინდუსტრიასა და, მათ შორის, ქართულ წარმომადგენლობებზე, ამ ეტაპზე რთული სათქმელია. იქამდე კი, პორშეს საქართველოს ოფისში პანდემიის წელი შეაჯამეს. პორშე ცენტრი თბილისმა გასული წელი რეკორდულად მაღალი მაჩვენებლებით დაასრულა. გაყიდვები წლიურად 65%-ით, 2019 -თან შედარებით კი 32%-ით გაიზარდა. თეგეტა ჯგუფში შემავალმა კომპანიამ 2022-ისთვის კიდევ უფრო მასშტაბური ამოცანები დაისახა მიზნად. კომპანია მზად არის, დანაპირები შეასრულოს — პრემიუმ ბრენდის მომხმარებელს, ახალ მოდელებთან ერთად, გაუმჯობესებული, კიდევ უფრო მაღალი ხარისხის სერვისი შესთავაზოს. როგორია კომპანიის სტრატეგია ამ მიზნის შესასრულებლად?

უკვე მიღწეულ შთამბეჭდავ შედეგებსა და მიმდინარე წლის ამბიციურ გეგმებზე პორშე ცენტრი თბილისის გენერალური დირექტორი, პეტრე წაქაძე საუბრობს.

"2021 წელს კომპანიამ 91 ახალი და 30 მეორადი პორშე გაყიდა, თუმცა, პოტენციალი მეტი იყო. მთავარ ხელისშემშლელ ფაქტორს პანდემიის მორიგი ტალღა და მისი თანმხლები პრობლემები წარმოადგენდა, მათ შორის, პირველ რიგში მიკროჩიპების დეფიციტი, რამაც არაერთი კომპანიის წარმოება შეაფერხა. ეს საკითხი, გარკვეულწილად, პორშე ცენტრი თბილისსაც შეეხო. მაგრამ იმის გათვალისწინებით, რომ პოტენციური რისკები ბევრად ადრე შევაფასეთ, გლობალურ გამოწვევას მაქსიმალურად მომზადებულები შევხვდით. საჭირო იყო თამამი ნაბიჯები, რაშიც დიდი ხელშეწყობა მივიღეთ პორშეს სათავო ოფისისგან", — აცხადებს პეტრე წაქაძე.

კრიზისის რეჟიმის სამუშაო პროცესად ქცევა და სირთულეების შესაძლებლობების ჭრილში განხილვა პორშე ცენტრი თბილისისთვის უწყვეტ ჯაჭვად იქცა, რაშიც ყველა თანამშრომელს დიდი წვლილი მიუძღვის.

"2021 წელი პორშესთვის შემოსავლების ნაწილშიც რეკორდული იყო. 2020-თან შედარებით 90%-იანი ზრდა გვქონდა, ხოლო 2019-თან შედარებით — 96%-იანი. რა თქმა უნდა, მეტად ორგანიზებულად შევხვდით პანდემიურ პერიოდს და ის საკითხებიც გავითვალისწინეთ, რომლებსაც კრიზისულ პერიოდში 2020 წელს შევეჩეხეთ. მთავარი ისაა, რომ თამამი ნაბიჯების გადადგმის არ შეგვეშინდა, რაშიც პორშე ცენტრი თბილისის გუნდის დიდი მხარდაჭერა ვიგრძენით და რამაც მოგვცა მუხტი, წარსულზე ნაკლები გვეფიქრა და პორშეს სიჩქარით გვევლო წინ".

პორშეს გამორჩეულ მოდელებს შორის, მსოფლიო მასშტაბით, 2021 წელს განსაკუთრებით პოპულარული Porsche Taycan იყო, რომლის გაყიდვებმაც 41,296 შეადგინა. ტაიკანი პორშეს პირველი სერიული ელექტრომობილია, რომელზეც კომპანია წლების განმავლობაში მუშაობდა, რათა იდეალური სპორტული ელექტრო ავტომობილი მიეღო.

"პორშემ ეს ნამდვილად შეძლო. ტაიკანი არ არის მხოლოდ ელექტრო ავტომობილი, მასში პორშეს ხასიათი, პორშეს DNA იგრძნობა. ბაზარზე ლიდერის პოზიცია ტაიკანმა, როგორც საუკეთესო ელექტრო ავტომობილმა, 40-ზე მეტი ყველაზე პრესტიჟული ჯილდოთი დაამტკიცა. ინტერესი დიდი იყო. როგორც მსოფლიო, ისე ქართულ ბაზარზე ტაიკანმა შექმნა მოლოდინები, რომლებიც მართვის პირველი წამებიდან მართლდება"

პორშე ცენტრი თბილისი, რომელიც საქართველოში პრემიუმ ბრენდის ექსკლუზიური წარმომადგენელია, იყო პირველი, რომელმაც ქართულ ბაზარზე პორშე ტაიკანის სახით სრულფასოვანი ელექტრო ავტომობილი შემოიყვანა. გაყიდვების პროგნოზირება არათუ რთული, არამედ შეუძლებელიც იყო.

ფოტო: თეგეტა მოტორსი

"ტაიკანი 2020-ში შემოვიყვანეთ. პირველი თვეების განმავლობაში მომხმარებელი მას მხოლოდ აკვირდებოდა. ამ პერიოდში ინფორმაციის ინტენსიურად და სწორად მიწოდებამ წარმატებულ გაყიდვებში ძალიან დიდი როლი ითამაშა. დღესდღეობით 30-ზე მეტი ტაიკანია გაყიდული და მასზე მოთხოვნა უფრო და უფრო იზრდება. ჩვენ აქტიურად ვუწყობთ ფეხს მსოფლიო ტენდენციას ელექტრო და ჰიბრიდული ავტომობილების პოპულარიზაციის თვალსაზრისით. 2022 წელიც შესაბამისად დავგეგმეთ — ჯამურად, გაყიდული ავტომობილების 50% ჰიბრიდული ან ელექტროძრავის უნდა იყოს".

საერთაშორისო მოთხოვნებისა და, ამასთანავე, ქვეყანაში ელექტრიფიცირების ხელშეწყობის ფარგლებში, კომპანიამ საქართველოს 6 რეგიონში ელექტროდამტენები განათავსა, რომლითაც როგორც ტაიკანის, ისე ნებისმიერი ელექტრომობილის დატენაა შესაძლებელი. პორშე ცენტრი თბილისი გეგმავს, რომ 2022 წელს ელექტრომობილის დამტენები ახალ ლოკაციებზეც განათავსოს და მეტი რეგიონი მოიცვას.

"პორშე ცენტრი თბილისი რეგიონის მასშტაბით ელექტრო ავტომობილების სერვისის პირველი ჰაბია, რაც ჩვენთვის ძალიან მნიშვნელოვანი და საამაყოა. ამის მისაღწევად ჩვენ, ერთი მხრივ, განვახორციელეთ საკმაოდ დიდი ინვესტიცია როგორც ელექტრო ავტომობილების დამტენებისა და სპეცინსტრუმენტების შესყიდვის, ისე საგანმანათლებლო მიმართულებით. ჩვენი მექანიკოსები მუდმივად გადიან გადამზადების კურსებს სხვადასხვა ქვეყანაში. წელს ჩვენმა თანამშრომლებმა ელექტროავტომობილებთან მუშაობის დამადასტურებელი ვერცხლის სერტიფიკატები მიიღეს".

როგორც იცით, პორშეს ისტორია სპორტული მანქანებიდან იწყება. პორშეს დახვეწილი და განსაკუთრებული მოდელებიდან ერთ-ერთი ყველაზე სახელგანთქმული და ლიმიტირებული მოდელია Porsche 911, GT2 RS. ამ იშვიათ მოდელებს თბილისის ქუჩებშიც შეხვდებით.

"ძალიან გვიხარია, რომ ამ ინჟინრულ შედევრებზე წლიდან წლამდე მზარდია მოთხოვნა საქართველოშიც, სადაც ჩვენ ბაზრის უპირობო ლიდერები ვართ. 2021 წელს, 2020 წელთან შედარებით, მომხმარებლებს სამჯერ მეტი სპორტული მანქანა მივაწოდეთ, რაც, პორშე ცენტრი თბილისის ისტორიაში, ასევე რეკორდული გაყიდვების მაჩვენებელია.

ზოგადად, 911 პორშეს საკულტო მოდელია. საქართველოს ბაზარზე რამდენიმე 911 GT2 RS-ია. ეს მოდელი 911-ებში ყველაზე მძლავრია და უფრო სარბოლო ტრასაზეა ორიენტირებული. ის შეზღუდული რაოდენობით იწარმოება დროის გარკვეულ მონაკვეთებში. შესაბამისად, GT2 RS-სა და, ზოგადად, პორშეს GT ვერსიებს, კონკრეტული სამიზნე აუდიტორია ჰყავს და სასიხარულოა, რომ ქართველი მომხმარებლების ინტერესი ამ თვალსაზრისითაც გაზრდილია", — აცხადებს ცენტრის გენერალური დირექტორი.

ფოტო: თეგეტა მოტორს

2022-ის მთავარი სიახლე ახალი, ბევრად უფრო მასშტაბური შოურუმია. ცენტრი, რომლის განახლებაც უკვე დაწყებულია, პორშეს უახლესი სტანდარტებით იქნება მოწყობილი. კომპანიაში აცხადებენ, რომ ასეთი სტანდარტების შოურუმი ჯერ მხოლოდ მსოფლიოს რამდენიმე ქვეყანაშია, ერთ-ერთი კი სწორედ საქართველო იქნება. ახალი ცენტრის გახსნა ივნისში იგეგმება.

"ახალი, თანამედროვე სტანდარტების შესაბამისი სერვისცენტრის მშენებლობა გაზრდილი მოთხოვნიდან გამომდინარე გახდა საჭირო, რათა მომხმარებლებისთვის სასურველი სერვისი და პრემიუმ ბრენდის ახალი მოდელები კიდევ უფრო სწრაფად შეგვეთავაზებინა. წელს განახლებული მოდელების მხრივ წარმოვადგენთ კაიენის და პანამერას Platinium Edition ვერსიებს, ასევე Taycan GTS-ს და მეოთხე კვარტალში უკვე - 911 GT3 RS-საც. მუდმივად ვცდილობთ, ავტომობილის შეძენის პროცესი ჩვენი მომხმარებლისათვის კიდევ უფრო მოქნილი გავხადოთ. ჩვენი ციფრული სერვისები ახლა უფრო მრავალფეროვანია. ვთარგმნეთ და ქართულ ენაზე შევთავაზეთ წელს მომხმარებელს პორშეს კონფიგურატორი, რომლის დახმარებითაც სასურველი მოდელის აწყობას საკუთარი გემოვნებით შეძლებთ".

წლის გეგმა კვლავ რეკორდსმენობაა — პორშე ცენტრი თბილისი 2022 წლის ისევ რეკორდული გაყიდვებით დახურვას გეგმავს. მოსალოდნელია, რომ მიმდინარე წლის მესამე კვარტალამდე კვლავაც დარჩება ავტომობილის სხვადასხვა კომპონენტის გლობალური დეფიციტი, რაც, გარკვეულ შემთხვევებში, დაგეგმილ გრაფიკებთან აცდენას იწვევს. თუმცა, ამაზე პორშე ცენტრი თბილისის გენერალური დირექტორი ერთი ფრაზით გვპასუხობს: "ჩვენთვის გამოწვევები არ აღიქმება როგორც პრობლემა, პირიქით, მეტ მოტივაციას გვაძლევს, რათა გავიზარდოთ და გერმანული ხარისხითა და სიზუსტით შევთავაზოთ მომხმარებლებს მათთვის სასურველი მსოფლიოს ინჟინრული შედევრი-Porsche J".