ცნობილი რუსულენოვანი მწერლები რუსულად მოსაუბრე ადამიანებს უკრაინაში მიმდინარე ომზე სიმართლის თქმისა და სწორი ინფორმაციის გავრცელებისკენ მოუწოდებენ. მწერლებს შორის არიან სვეტლანა ალექსიევიჩი, ვლადიმირ სოროკინი, ლუდმილა ულიცკაია, დმიტრი გლუხოვსკი, ბორის აკუნინი და სხვები. მათ განცხადებას მხარს უჭერენ მსოფლიოში ცნობილი სხვა, არარუსულენოვანი ავტორებიც: ოლგა ტოკარჩუკი, ჰერტა მიულერი, ელფრიდე იელინეკი და ჯონ მაქსველ კუტზეე.

"როგორც მწერლები, მივმართავთ ყველას, ვინც რუსულად საუბრობს. ნებისმიერი ეროვნების ადამიანებს — მათ, ვისთვისაც რუსული მშობლიური, მეორე ან მესამე ენაა.

"დღეს რუსულ ენას რუსეთის სახელმწიფო სიძულვილის გასაღვივებლად და უკრაინაში მიმდინარე სამარცხვინო ომის გასამართლებლად იყენებს. ოფიციალური მედია რუსულ ენაზე განუწყვეტლივ გადმოსცემს სიცრუეს, რომლითაც აგრესიას კვამლის ფარდით ნიღბავს. რუს ხალხს უკვე წლებია, ამ ტყუილებით კვებავენ. ინფორმაციის გავრცელების დამოუკიდებელი წყაროები თითქმის მთლიანად განადგურდა, ოპოზიციის ლიდერები კი — გააჩუმეს. სახელმწიფო პროპაგანდის მანქანა მთელი ძალით მუშაობს.

"ასეთ სიტუაციაში კრიტიკულად მნიშვნელოვანია, რუსმა მოქალაქეებმა უკრაინაში რუსეთის აგრესიის შესახებ სრული სიმართლე გაიგონ. სიმართლე უკრაინელების წამებისა და დანაკარგების შესახებ. იმ მშვიდობიანი მოსახლეობის შესახებ, რომელიც მიზანში ამოიღეს და დახოცეს. იმ საფრთხის შესახებ, რომელიც ევროპის მთელ კონტინენტს და, შესაძლოა, მთელ კაცობრიობასაც ემუქრება — თუკი გავითვალისწინებთ, რომ ეს ბირთვული საფრთხეა.

"თქვენ რუსულად ლაპარაკობთ. ეს მნიშვნელოვანია. გთხოვთ, კომუნიკაციის ყველა შესაძლო გზა გამოიყენეთ. ტელეფონები. მესენჯერი. ელფოსტა. ხმა მიაწვდინეთ იმ ხალხს, ვისაც იცნობთ. მათაც, ვისაც არ იცნობთ. სიმართლე უთხარით. თუ ვლადიმირ პუტინს არც ესმის და ვერც ხედავს, რუსებმა შეიძლება მათ მოუსმინონ, ვინც მათ ენაზე საუბრობს. ეს დანაშაულებრივი ომი უნდა დასრულდეს".

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში

ასევე იხილეთ: