საპატრიარქოს სოციალური დაცვის დეპარტამენტის ხელმძღვანელმა ზურაბ ვარაზმა ნარკომანია და თამბაქოს მოწევა მკვლელობასთან გააიგივა. ამის შესახებ ვარაზმა პარლამენტის ჯანდაცვის კომიტეტის სხდომაზე განაცხადა:

"მისი უწმინდესობის ლოცვა-კურთხევით, ნარკომანიაც, ალკოჰოლიზმიც და თამბაქოს მოწევაც ითვლება ადამიანის წინააღმდეგ ჩადენილ დანაშაულად, ღვთის წინაშე ითვლება ცოდვად, მკვლელობის ცოდვაში გადის და ითვლება სირცხვილად."

ზურაბ ვარაზის თქმით, საჭიროა კანონი შეეხოს ფიზიკური პირების საცხოვრებელ ადგილებსაც:

"რა თქმა უნდა, ამის გაკონტროლება ძალიან ძნელი იქნება, მაგრამ ბავშვების დაცვა - ბავშვები უდიდეს დროს სახლში ატარებენ, და უმძიმესი და უსაშინლესი მაგალითია, მშობლები, რომლებიც აბოლებენ და ბავშვს ეუბნებიან, შენ არ მოწიოო, ის ბავშვი აუცილებლად მოწევს. აქედან გამომდინარე, თუ ყურის აწევა და კუთხეში დაყენება არის ძალადობა, ესეც საშინელი ფორმა უნდა იყოს ძალადობის. ვიფიქროთ ამ საკითხზე."

თამბაქოს შესახებ კანონში ცვლილებები პარლამენტმა პირველი მოსმენით მიიღო. კანონპროექტის მიხედვით, ფიზიკური პირის საცხოვრებელი ადგილის გარდა, საზოგადოებრივი თავშეყრის ადგილებში და შენობა ნაგებობებში მოწევა 2018 წლიდან აიკრძალება.