ოცნება უკრაინის საკითხზე მოწვეულ რიგგარეშე სხდომას არ დაესწრება. ქართული ოცნების წევრის, გივი მიქანაძის აზრით, ქვეყნის ყველა პირველი პირი "მკაფიო შეფასებებითა და განცხადებებით" გამოეხმაურა რუსეთის ღია სამხედრო აგრესიას უკრაინაში. მან ასევე აღნიშნა, რომ პარლამენტმა მიიღო უკრაინის მხარდამჭერი რეზოლუცია, თუმცა მასში რუსეთი ნახსენები არ არის.

მიქანაძე ამბობს, რომ მთავრობა მუშაობს ჰუმანიტარული დახმარების დეტალებზე, პარლამენტის საგარეო კომიტეტი კი ამზადებს კიდევ ერთ მხარდამჭერ განცხადებას.

"რაც შეეხება ხვალინდელ სხდომას და ნაც. მოძრაობას, ჩვენ არ ვაპირებთ მათ პოპულიზმში თუ თავისი მავნებლობების ჩამორეცხვის კამპანიაში და მათ დღისწესრიგში ჩართვას. შესაბამისად, ჩვენი ფრაქცია ამაში მონაწილეობას არ მიიღებს, რის გამოც ხვალინდელი სხდომა, რომელიც მხოლოდ ნაც. მოძრაობის პოპულისტურ და მავნებლურ მიზნებს და არა უკრაინის მხარდაჭერას ემსახურება, არ და ვერ გაიმართება", — თქვა მან.

როგორც მიქანაძე ამბობს, საქართველო მოქმედებს დასავლელ პარტნიორებთან მჭიდრო კომუნიკაციის პირობებში, მხარს უჭერს მეგობარ უკრაინას და უკრაინელ ხალხს. მისი შეფასებით, არ არის ნაციონალური მოძრაობის წარმომადგენლების "ყალბ ემოციებზე" და "პოპულიზმზე" აყოლის დრო.

"იკვეთება, რომ რადიკალური ოპოზიციის, რომელიც წარმოადგენს მეხუთე კოლონას საქართველოში 2008 წლიდან მოყოლებული დღემდე, პირდაპირი ამოცანაა, საქართველოსკენ გადმოვიდეს მეტი ყურადღება, შეიქმნას პროვოკაციული ფონი და ჩვენმა ქვეყანამაც არა პრაგმატული, არამედ ემოციური გადაწყვეტილებები მიიღოს და გამოუსწორებელი შეცდომები დაუშვას. ჩვენი ამოცანა კი პირიქით, პრაგმატული პოლიტიკის გაგრძელება, ჩვენი ქვეყნის, უსაფრთხოების, ეროვნული ინტერესების და ეკონომიკის დაცვაა", — აღნიშნავს ის.

25 თებერვალს საქართველოს პარლამენტში რიგგარეშე სხდომა გაიმართება. საპარლამენტო ოპოზიცია რუსეთის უკრაინაში შეჭრისა და ომის პარალელურად რიგგარეშე საპარლამენტო სხდომის მოწვევას ითხოვდა. საქართველოს პრეზიდენტმა, სალომე ზურაბიშვილმა თქვა, რომ პარლამენტის რიგგარეშე სხდომის მოთხოვნას ხელს მოაწერდა. შალვა პაპუაშვილი კი ამბობდა, რომ ამის საჭიროება არ იდგა.