სოციალური ქსელების მოხმარების მასშტაბები ყოველდღიურად იმდენად იზრდება, რომ დღეს საარჩევნო კამპანიების ძირითადი ნაწილიც სწორედ მათი საშუალებით ვრცელდება და აღწევს სამიზნე აუდიტორიამდე. შესაბამისად, ინტერნეტ სივრცეში უსაფრთხოების გამოწვევები ექმნებათ პოლიტიკოსებს, ჟურნალისტებს და საჯაროდ აქტიურ პირებს.

ანგარიშებს, რომლებიც საარჩევნო პერიოდის დროს საფრთხეებს აწყდებიან, დამატებითი დაცვის სისტემები სჭირდებათ. სწორედ ამიტომ შეიქმნა Facebook Protect-ის პროგრამა, რომელიც თავდაპირველად, 2019 წელს აშშ-ში ჩაეშვა და დღეს მსოფლიოს მრავალ ქვეყანაში, მათ შორის, საქართველოშიც დაინერგება. Facebook Protect უზრუნველყოფს იმ ადამიანების უსაფრთხოებას, რომელთა ანგარიშები მაღალი რისკის ქვეშაა.

პროგრამა კანდიდატებს, მათ საარჩევნო კამპანიებსა და თანამდებობის პირებს ეხმარება, ანგარიშებისთვის უფრო ძლიერი დაცვის სისტემები მიიღონ, როგორიცაა 2-ეტაპიანი ავტორიზაცია და პოტენციურ ჰაკერულ თავდასხმებზე დაკვირვება.

Meta-ში CEE საჯარო პოლიტიკის ხელმძღვანელმა, ჯეიკობ ტუროვსკიმ განაცხადა, რომ პროგრამაში რეგისტრაციის შემდეგ ისინი ანგარიშებს დააკვირდებიან და უკეთესი დაცვის სისტემებს უზრუნველყოფენ.

"ჩვენ ყოველთვის ვეძებთ გზას, რომ მავნე აქტორებზე ერთი ნაბიჯით წინ ვიყოთ. შესაძლოა, ვერასდროს დავიჭიროთ ყველა ცუდი აქტორი, თუმცა ეს პროგრამა რამდენიმე ნაბიჯს შორის ერთ-ერთია იმისთვის, რომ მათ ანგარიშების გატეხვა გავურთულოთ", — განაცხადა მან.

როგორ მუშაობს დაცვის სისტემა

პროგრამაში ჩართული ჯგუფები მოიცავს სახალხო დამცველს, ჟურნალისტებსა და თანამდებობის პირებს. მათ, ვისაც Facebook Protect-ის გამოყენების უფლება ექნება, Facebook-ზე გამოუჩნდებათ შეთავაზება, რომ პროგრამას შეუერთდნენ. თუ Facebook-ზე არ მიიღებთ შეტყობინებას, რომ დარეგისტრირების უფლება გაქვთ, დამატებით არანაირი ქმედება არ არის საჭირო.

"Facebook Protect-ისთვის ჩვენ ვიმუშავეთ, რომ დარეგისტრირება და 2-ეტაპიანი ავტორიზაცია მაქსიმალურად შეუფერხებელი ყოფილიყო ამ ჯგუფებისთვის. ვიცით, რომ იქნება მცირე ჯგუფი, რომლებიც თავიდანვე არ შეუერთდება პროგრამას, მაგალითად, ისინი ვინც ნაკლებად აქტიურია ჩვენს პლატფორმაზე მოცემული დროის მონაკვეთში. თუმცა, ჩვენ გვჯერა, რომ ეს ძალიან მნიშვნელოვანი ნაბიჯია მათთვის, ვინც ხშირად ხდება სამიზნე", — განმარტებულია პროგრამის აღწერაში.

დარეგისტრირებული გვერდების ყველა ადმინისტრატორს მოეთხოვება, რომ გვერდის გამოქვეყნების ავტორიზაცია გაიაროს, მიუხედავად იმისა, ინდივიდუალური ადმინები აირჩევენ თუ არა ამ პროგრამით სარგებლობას. გვერდის გამოქვეყნების ავტორიზაცია მათ, ვინც გვერდს მართავს, სთხოვს, რომ ანგარიშები 2-ეტაპიანი ავტორიზაციით დაიცვან და დაადასტურონ მათი ძირითადი ქვეყნების მდებარეობა. დამატებით, ადმინისტრატორებს მოეთხოვებათ, რომ გვერდი ნამდვილი პროფილებიდან მართონ.