ბრედ პიტი ანჯელინა ჯოლის იმის გამო უჩივის, რომ მათი საერთო მფლობელობის ფრანგული ღვინის საწარმოდან, სახელად Château Miraval, ყოფილმა ცოლმა საკუთარი წილი გაყიდა.

პიტმა და ჯოლიმ ღვინის საწარმოს აქციები 2008 წელს შეიძინეს და 6 წლის შემდეგ სწორედ იქ იქორწინეს. პიტის თქმით, ყოფილ ცოლთან შეთანხმებული იყო, რომ თავიანთ აქციებს ერთმანეთის ნებართვის გარეშე არ გაყიდდნენ.

ანჯელინა ჯოლიმ ღვინის საწარმოდან საკუთარი წილი რუს ოლიგარქ იური შეფლერს ისე მიჰყიდა, რომ ამის შესახებ ბრედ პიტი არ გააფრთხილა. "ჯოლიმ წაკუთარი წილის გაყიდვისას იცოდა, რომ შეფლეფი იმ ბიზნესის კონტროლს შეეცდებოდა, რომელსაც პიტმა თავი მიუძღვნა, რადგან ყოფილი ქმრისთვის ხელის შეშლა სურდა", — ამბობს ბრედ პიტის ადვოკატი.

ფოტო: Getty Images

ღვინის საწარმო საფრანგეთის სოფელ კორენსში მდებარეობს და წყვილმა ის დაახლოებით 28 მილიონ ევროდ შეიძინა. 2016 წელს წყვილი განქორწინდა, მაგრამ ღვინის საწარმო საერთო ქონებად რჩებოდა, რომლის ყიდვისას პიტმა 60% გადაიხადა, ხოლო ანჯელინამ 40%.

პიტის ადვოკატის განცხადებით, ანჯელინამ 2021 წლის იანვარში ყოფილ ქმარს წერილობით აცნობა საკუთარი წილის გაყიდვის შესახებ. ამ გადაწყვეტილებამ კი ბრედ პიტის მიერ ბიზნესის მართვას დიდი ზიანი მიაყენა. პიტის ადვოკატები სასამართლო პროცესის ჩატარებას ითხოვენ, ანჯელინა კი ამ ყველაფრის შესახებ ჯერჯერობით კომენტარს არ აკეთებს.