ინგლისის ქალაქ ჩესტერის ზოოპარკს ახალი ბინადარი ჰყავს. დაწესებულების 90-წლიანი არსებობის განმავლობაში, აქ პირველად დაიბადა მილკბილა.

4 იანვარს დაბადებული პატარას სახელზე დიდხანს ფიქრობდნენ და, საბოლოოდ, გადაწყვიტეს, ჰარი პოტერის ცნობილი ელფი პერსონაჟის პატივსაცემად მისთვის დობი დაერქმიათ. ჩესტერის ზოოპარკის ახალი მოსახლე თავის სეხნიას ნამდვილად ჰგავს, განსაკუთრებით, ყურებით.

"როგორც კი დედის გვერდით პატარა შევნიშნეთ, მაშინვე ჰარი პოტერის პერსონაჟს, დობის, მივამსგავსეთ", — ამბობს ზოოპარკის წარმომადგენელი, დეივ უაითი.

დედასთან ერთად დობიზე განსაკუთრებულად ზრუნავენ ზოოპარკის თანამშრომლები, რადგან მილკბილები მშობლობისთვის, ცოტა არ იყოს, მოუქნელები არიან. თუმცა, პატარას ყველაზე მეტად მაინც დედამისთან, ონისთან, ჩახუტება და დროის გატარება მოსწონს.

დობი დედასთან ერთად

ფოტო: Chester Zoo

დობის გარდა ევროპის მასშტაბით ზოოპარკებში 65 მილკბილა ცხოვრობს, მსოფლიოში კი მათი რიცხვი 108-ს შეადგენს.

"ზოოპარკებში ისეთ სახეობებზე ზრუნვა, როგორიც მილკბილაა, საშუალებას გვაძლევს, მათ შესახებ მეტი გავიგოთ: როგორ ცხოვრობენ, როგორ იქცევიან და სხვა", — ამბობს ზოოპარკის წარმომადგენელი, მარკ ბრეიშოუ, — "მთელ ამ ინფორმაციას წამყვან კონსერვაციულ ზოოპარკებს ვუზიარებთ და სახეობების დაცვას ასე უზრუნველვყოფთ".

ჩესტერის ზოოპარკის ცნობით, ბუნებრივად სუბსაჰარულ აფრიკაში მცხოვრებ მილკბილებზე ხორცის მოსაპოვებლად ნადირობენ. ამასთან, სასოფლო-სამეურნეო წარმოების განვითარებასთან ერთად, მათი ჰაბიტატი მცირდება.