Samsung საზოგადოებას 9 თებერვალს ახალ სმარტფონებსა და სხვა მოწყობილობებს წარუდგენს, თუმცა ამ წელს ღონისძიება სხვა ფორმატითაც ჩატარდება. მსურველები Samsung Unpacked 2022-ს თვალს ახლა უკვე მეტავერსშიც მიადევნებენ.

ტრანსლაცია თბილისის დროით 19:00 საათზე დაიწყება. მისი ყურების საშუალება მომხმარებლებს, ტრადიციულად, კომპანიის ოფიციალურ ვებგვერდზე ექნება, სადაც ცოტა ხნით ადრე სპეციალური ფანჯარა გამოჩნდება. ასევე, შეგიძლიათ ეწვიოთ Samsung-ის YouTube არხს.

უნდა აღინიშნოს, რომ წლევანდელი ღონისძიება, შარშანდელთან შედარებით, 1 თვით გვიან შედგება. მაშინ, 14 იანვარს, მსოფლიოს Galaxy S21 და S21 Ultra გააცნეს, ისევე, როგორც Galaxy Buds Pro. ამჟამად კი S სერიის ახალ ფლაგმანებს ვიხილავთ.

ალბათ, მეტავერსის ბოლოდროინდელი პოპულარობიდან გამომდინარეა, რომ კომპანიამ ამჯერად იქ გადანაცვლებაც გადაწყვიტა. ჯერჯერობით უცნობია, რითი იქნება გამორჩეული ეს სივრცე, სახელად Samsung 837X, თუმცა ცდად ნამდვილად ღირს.

იქ შესვლა პლატფორმა Decentraland-ითაა შესაძლებელი, სადაც მონაწილეები Unpacked 2022-ს 2D-ში უყურებენ, NFT-ებს შეაგროვებენ და ვირტუალურ გარემოს დაათვალიერებენ. სრულყოფილი გამოცდილების მისაღებად, საჭიროა, სტუმრის სტატუსით არ დავრეგისტრირდეთ, არამედ MetaMask-ის ციფრული საფულე გამოვიყენოთ.

აღსანიშნავია, რომ ახალი პროდუქტების წარდგენას პირდაპირ ეთერში სხვაგანაც აჩვენებენ, მაგალითად, Facebook-ზე, Reddit-ზე, Twitch-ზე, Amazon Live-ზე,TikTok-სა და Twitter-ზე.