4 თებერვლის ვაჭრობის შედეგად, ლარი დოლართან მიმართებით გამყარდა. დღეს დადგენილი კურსის მიხედვით, ერთი დოლარის ღირებულება 2,9867 ლარი გახდა, რაც აქამდე მოქმედ კურსთან შედარებით 3,12 თეთრით გამყარებას ნიშნავს. აღსანიშნავია, რომ ეროვნული ვალუტა დოლართან მიმართებით ბოლო 20 თვის მაქსიმალურ ნიშნულამდეა გამყარებული. ერთი დოლარის ღირებულება 3 ლარზე ნაკლები ბოლოს 2020 წლის ივნისში იყო.

რაც შეეხება ევროს, ამ ვალუტასთან მიმართებით ლარი 2,06 თეთრით გაუფასურდა და ერთი ევრო 3,4248 ლარს გაუტოლდა.

ეკონომისტები ეროვნული ვალუტის დოლართან მიმართ გამყარების ერთ-ერთ ფაქტორად ფულადი გზავნილების გაზრდილ მოცულობას ასახელებენ — როგორც ცნობილია, 2021 წელს საქართველოში $2,35 მილიარდის ფულადი გზავნილი გადმოირიცხა, რაც გასულ წლებთან შედარებით რეკორდულად მაღალი მაჩვენებელია.

გარდა ამისა, ეროვნული ბანკის მხრიდან გამკაცრებულია მონეტარული პოლიტიკაც, რაც ლარის გაცვლითი კურსის დასტაბილურებისთვის ხელისშემწყობი ფაქტორია.

სებ-ის მიერ დღეს დადგენილი გაცვლითი კურსი ხვალ, 5 თებერვალს შევა ძალაში.