პირველი თებერვლის ვაჭრობის შედეგად ლარი დოლართან მიმართებით გამყარდა, ხოლო ევროსთან გაუფასურდა.

დღეს დადგენილი კურსის მიხედვით, ერთი დოლარის ღირებულება 3,0451 ლარი გახდა, რაც აქამდე მოქმედ კურსთან შედარებით 0,67 თეთრით გამყარებას ნიშნავს. აღსანიშნავია, რომ ეროვნული ვალუტა დოლართან მიმართებით ბოლო 19 თვის მაქსიმალურ ნიშნულამდეა გამყარებული.

რაც შეეხება ევროს, ამ ვალუტასთან მიმართებით ლარი 1,78 თეთრით გაუფასურდა და ერთი ევრო 3,4282 ლარს გაუტოლდა.

ეკონომისტები ეროვნული ვალუტის დოლართან მიმართ გამყარების ერთ-ერთ ფაქტორად ფულადი გზავნილების გაზრდილ მოცულობას ასახელებენ — როგორც ცნობილია, 2021 წელს საქართველოში $2,35 მილიარდის ფულადი გზავნილი გადმოირიცხა, რაც გასულ წლებთან შედარებით რეკორდულად მაღალი მაჩვენებელია. გარდა ამისა, გამკაცრებულია მონეტარული პოლიტიკაც, რაც ლარზე მოთხოვნას ზრდის და გაცვლითი კურსის დასტაბილურებისთვის ხელისშემწყობი ფაქტორია.

სებ-ის მიერ დღეს დადგენილი გაცვლითი კურსი ხვალ, 2 თებერვალს შევა ძალაში.