გორის სამხედრო ჰოსპიტალში აცხადებენ, რომ ექსპრეზიდენტ მიხეილ სააკაშვილის კლინიკიდან გადაყვანის შემდეგ მისი კადრების შენახვის ვალდებულება არ ჰქონდათ. მათი თქმით, კამერები სპეციალურად მიხეილ სააკაშვილისთვის, "მაღალი საზოგადოებრივი ინტერესიდან გამომდინარე" დაამონტაჟეს.

"მიხეილ სააკაშვილის გორის სამხედრო ჰოსპიტალში გადაყვანის პერიოდში მის უსაფრთხოებასა და ჯანმრთელობასთან დაკავშირებული მაღალი საზოგადოებრივი ინტერესიდან გამომდინარე, დამონტაჟდა კამერები. როგორც მოგეხსენებათ, მიხეილ სააკაშვილის გორის სამხედრო ჰოსპიტალიდან უკან სასჯელაღსრულების დაწესებულებაში გადაყვანა განხორციელდა 30 დეკემბერს, 00:15 საათზე. რადგან აღნიშნული კამერები ემსახურებოდა მხოლოდ და მხოლოდ მიხეილ სააკაშვილის უსაფრთხოების მიზნებს, გორის სამხედრო ჰოსპიტალში ამ კადრების შენახვის არავითარი ვალდებულება აღარ არსებობდა", — განმარტავენ ჰოსპიტალში.

მათი თქმით, სახელმწიფო ინსპექტორის სამსახურმა ეს კადრები სააკაშვილის გადაყვანიდან მეორე დღეს მოითხოვდა. ჰოსპიტალში აცხადებენ, რომ კადრები რომც არ წაეშალათ, ინსპექტორის მოთხოვნას სრულად კამერების ტექნიკური მახასიათებლის გამო ვერ შეძლებდნენ.

"მიხეილ სააკაშვილის გორის სამხედრო ჰოსპიტალიდან გადაყვანიდან თითქმის ორი დღის შემდეგ, 31 დეკემბერს 18:25 წუთზე სახელმწიფო ინსპექტორის სამსახურიდან შემოვიდა წერილი, სადაც მოთხოვნილი იყო 27 დეკემბრიდან 28 დეკემბრის ჩათვლით ვიდეო მასალის დაარქივება. როგორც უკვე განვმარტეთ, აღნიშნული ვიდეომასალა უკვე წაშლილი იყო, რადგან არ არსებობდა მისი შენახვის არც ვალდებულება და არც მიზანშეწონილობა.

უფრო მეტიც, სახელმწიფო ინსპექტორის მოთხოვნა სრულად ვერცერთ შემთხვევაში ვერ დაკმაყოფილდებოდა, კამერები კვლავ მუშა მდგომარეობაშიც კი რომ ყოფილიყო, რადგან აღნიშნულ კამერებს აქვთ 72 საათიანი მუშაობის რეჟიმი, რის შემდეგაც ავტომატურად ხდება მასალის გადაწერა", — განმარტავს ჰოსპიტალის ადმინისტრაცია.

ისინი სპეკულაციას უწოდებენ მიმდინარე დისკუსიას იმასთან დაკავშირებით, რომ ჰოსპიტალს, შესაძლოა, მიზანმიმართულად წაეშალა ექსპრეზიდენტის კადრები.