მეტროში შშმ მოზარდის მიმართ განხორციელებული ძალადობის საქმეზე დაზარალებულის უფლებებს საქართველოს ახალგაზრდა იურისტთა ასოციაცია დაიცავს.

ორგანიზაციის განცხადებაში ნათქვამია, რომ უახლოეს პერიოდში ადვოკატი საგამოძიებო უწყებას საქმის მასალების გაცნობის მოთხოვნით მიმართავს და არასრულწლოვანთან შეთანხმებით შემდეგი ნაბიჯები დაიგეგმება.

"მედიას მოვუწოდებთ, თავი შეიკავონ უშუალოდ არასრულწლოვანთან კომუნიკაციისგან და დაიცვან არასრულწლოვანი პირების საქმეების გაშუქებისთვის დადგენილი სტანდარტები.

მაღალი საზოგადოებრივი ინტერესიდან გამომდინარე, საია გამოძიების მსვლელობის თაობაზე ინფორმაციას საზოგადოებას მოგვიანებით მიაწვდის", — ამბობენ ისინი.

კადრები, სადაც ჩანს, რომ პოლიციელი მოქალაქეს სცემს, გუშინ, 24 იანვარს გავრცელდა. თავდაპირველად, ვიდეო ერთ-ერთი მეტროსადგურის ესკალატორზეა გადაღებული, სადაც არასრულწლოვნის თანმხლები პირები პოლიციელს ეუბნებიან, რომ ის ყრუ-მუნჯია, რაზეც პოლიციელი პასუხობს:

"ყრუ-მუნჯია? რომ ავალაპარაკო ახლა? [...] აი, ახლა უნდა ავალაპარაკო".

სახელმწიფო ინსპექტორის განცხადებით ფაქტზე დაკავებულია 2 პოლიციელი. მისივე ინფორმაციით, გამოძიებით დადგინდა, რომ პოლიციელმა ფიზიკურად 17 წლის შეზღუდული შესაძლებლობის პირზე იძალადა. შედეგად, მან დაზიანებები თავისა და სახის არეში მიიღო. ასევე, განიცადა ძლიერი ფიზიკური ტკივილი და თავი დამცირებულად იგრძნო.