პრემიერმინისტრი, ირაკლი ღარიბაშვილი მდინარე იორდანესთან ქართული "კულტურის ცენტრის" შესაქმნელად კომისიას ქმნის. მისი თქმით, მუშაობაში მონაწილეობა საქართველოს საპატრიარქოს წარმომადგენელსაც სთხოვეს.

"როგორც იცით, საქართველოს გადაეცა 4 000 კვ. მ მიწა მდინარე იორდანესთან, მაცხოვრის ნათლობის ადგილის მიმდებარედ და საქართველოს კათოლიკოს პატრიარქის კურთხევით ამ წმინდა მიწაზე ქართული კულტური ცენტრის აშენებას ვგეგმავთ, სწორედ ამ მიზნით ჩვენ შევქმნით სამთავრობო კომისიას და დავიწყებთ მუშაობს კონცეფციაზე, პროექტსა და შემდეგ უკვე მშენებლობაზე გადავალთ.

ამ მიზნით შევქმნით დღეს უკვე კომისიას და კომისიის მონაწილეობაში მუშაობა ასევე ვთხოვეთ საპატრიარქოს წარმომადგენლებს, კერძოდ, მეუფე შიოს, მეუფე გერასიმეს, მეუფე დავითს, მეუფე თეოდორეს და დეკანოზ ანდრია ჯაღმაიძეს", — აღნიშნა ღარიბაშვილმა.

როგორც პრემიერმინისტრმა 19 იანვარს განაცხადა, იორდანიის მეფისა და პრინცის მიერ მიღებული გადაწყვეტილებით, საქართველოს მდინარე იორდანესთან მიწა გადაეცა. ამის შესახებ ღარიბაშვილმა სამების ტაძარში, წირვის დასრულების შემდეგ ისაუბრა.