ევროპული საქართველოს წევრის, გიორგი ტუღუშის განცხადებით, პარტია საკონსტიტუციო კომისიის დატოვებას განიხილავს, თუ საარჩევო სისტემაზე მისი მოთხოვნა არ დაკმაყოფილდება:

"დარიგებულ ვარიანტში გაუქმებულია მაჟორიტარული სისტემა და საუბარია მხოლოდ პროპორციულ სისტემაზე. ახლა ჩვენი მიზანია მივაღწიოთ იმას, რომ გაუნაწილებელი მანდატები არა ისე განაწილდეს, როგორც ეს მოცემულ ფორმულაშია, რომ პირველ ადგილას გასულმა პარტიამ მიიღოს, არამედ მოხდეს გადანაწილება პროპორციულად. შესაბამისად ეს არის ჩვენი ერთ-ერთი წინაპირობა და ვაპირებთ რომ მივაღწიოთ ამას. თუ არ დაკმაყოფილდება ჩვენი მოთხოვნები, შეიძლება, ჩვენც განვიხილოთ კომისიის დატოვება," - განაცხადა ტუღუშმა.

7 აპრილს, პარლამენტის თავმჯდომარემ განაცხადა, რომ მის ხელთ არსებული სარწმუნო ინფორმაციით, პრეზიდენტის ადმინისტრაციას არასამთავრობო ორგანიზაციებთან და პარტიებთან საკონსტიტუციო კომისიის დატოვებაზე კონსულტაციები აქვს.

აღნიშნული ბრალდება უარყო პრეზიდენტის ადმინისტრაციის უფროსმა, გიორგი აბაშიშვილმა და მას შეთქმულების თეორია უწოდა.