Daily Show-ს ყოფილმა წამყვანმა, ჯონ სტიუარტმა, ჯოან როულინგი გააკრიტიკა, რადგან მისი აზრით, მწერლის მიერ შექმნილი პერსონაჟები — გობლინები, ებრაულ კარიკატურებს ჰგვანან. "გინახავთ ჰარი პოტერი? თუ დაჰკვირვებიხართ სცენებს, რომლებშიც მოქმედება გრინგოტსის ბანკში ვითარდება? იცით ამ ბანკს ვინ მართავს? — ებრაელები", — განაცხადა წამყვანმა.

სტიუარტმა აღნიშნა, რომ ჯოან როულინგის შექმნილი გობლინები 1903 წლის ანტისემიტური წიგნიდან, The Protocols of the Elders of Zion, ებრაელების ილუსტრაციას ჰგავს.

"როცა გობლინი ჰარი პოტერში პირველად დავინახე, ველოდი, რომ ჯოან როულინგს ყველა გააკრიტიკებდა და იტყოდნენ, რომ სირცხვილია, ებრაელები ჯადოსნურ სამყაროშიც კი მიწისქვეშა ბანკის მმართველებად წარმოადგინო. თუმცა გობლინებში ხალხმა მხოლოდ "ჯადოქრები" დაინახა და ეს ძალიან უცნაური იყო", — დასძინა წამყვანმა.

ეს პირველი შემთხვევა არ არის, როცა ჰარი პოტერის გობლინებსა და ებრაულ კარიკატურას შორის მსგავსება დაინახეს. საბავშვო ლიტერატურის ავტორმა, მერიენ ლევიმ, ჯოან როულინგის გობლინები ნაცისტურ გერმანიაში შექმნილი ანტისემიტური მულტფილმებს პერსონაჟებს შეადარა.

ავტორის დასაცავად კი აღნიშნეს, რომ ჯოან როულინგმა ჰარი პოტერის წერისას ზოგიერთი პერსონაჟის იდეა ფოლკლორიდან და უკვე გავრცელებული წარმოდგენებიდან ისესხა. აქედან გამომდინარე, ბანკირების გარშემო არსებული წარმოდგენები თავად იყო ანტისემიტიზმით შთაგონებული და როულინგს ამის განზრახვა არ ჰქონია.

შეგახსენებთ, რომ ჯოან როულინგი სოციალურ ქსელებში გაკეთებული განცხადებების გამო ტრანსფობიაშიც რამდენჯერმე დაადანაშაულეს, რის შემდეგაც კრიტიკის ობიექტი არაერთხელ გახდა. იმის მიუხედავად, რომ ჯოან როულინგი ჰარი პოტერის საიუბილეო გადაცემაში, სახელად Return to Hogwarts, არ გამოჩენილა, ჯერ კიდევ დეკემბერში Warner Bros. კომპანიასა და ავტორს შორის განხეთქილებას უარყოფდა.

"20 წლის განმავლობაში ჯოან როულინგმა და Warner Bros-მა ერთად იმუშავებს, რათა ფანებისთვის სანახაობრივი ფილმები და ჯადოსნური სამყარო შეექმნათ. ჩვენ დღემდე ვთანამშრომლობთ და იმედგაცრუებულები ვართ, რადგან ამის საპირისპირო ცნობები ვრცელდება, რაც ჰარი პოტერის ფანებს გულს სტკენს. ვიმედოვნებთ, რომ ამ ამბით გულშემატკივრებს ისევ გავახარებთ", — ვკითხულობთ Warner Bros-ის განცხადებაში.

ასევე იხილეთ: