მას შემდეგ, აშშ-მა, ასადის მიერ ქიმიური იარაღის გამოყენების გამო, სირიაზე პირველი ავიაიერიში მიიტანა, დემოკრატმა ჰილარი კლინტონმა ამერიკის პრეზიდენტი დონალდ ტრამპი გააკრიტიკა.

ამერიკის პრეზიდენტობის ყოფილი კანდიდატის თქმით, მაშინ როდესაც ტრამპი სირიაში ქიმიური იარაღით მოკლული ბავშვების სურათებს იყენებს, ამავდროულად ის ამ ქვეყნის მოსახლეობას ამერიკის კარებს უკეტავს. ინფორმაციას CNN ავრცელებს.

"ძალიან მნიშვნელოვანია, რომ მსოფლიომ ასადის მკვლელი რეჟიმის შესაჩერებლად მეტი გააკეთოს. ამერიკის მიერ განხორციელებულ ქმედებას უფრო ვრცელი სტრატეგია უნდა მოჰყვეს, რომელიც სირიაში სამოქალაქო ომს დაასრულებს.

ტრამპის ადმინისტრაცია იმედია მიხვდება, რომ არ შეიძლება ერთ წამს სირიელი ბავშვების დაცვაზე ვისაუბროთ და მეორე წამს მათ ამერიკის კარები დავუხუროთ" - განაცხადა კლინტონმა.

ტრამპმა და პრეზიდენტის წარმომადგენლებმა განაცხადეს, რომ დონალდ ტრამპზე ძალიან იმოქმედა სირიაში ქიმიური იარაღით მოწამლული ბავშვების ვიდეოებისა და სურათების ნახვამ.

"როდესაც კლავ უდანაშაულო ბავშვებს, პატარა ბავშვებს, ქიმიური გაზით, რომელიც ასეთი საშინელია, ეს ძალიან ბევრ ხაზს კვეთს" - განაცხადა ტრამპმა, მანამ, სანამ ამერიკა სირიის სამთავრობო არმიაზე იერიშს მიიტანდა.

ამასთან ერთად, ტრამპის ადმინისტრაცია ამერიკაში სირიიდან მიგრანტების მიღებას ეწინააღმდეგება. ამერიკის პრეზიდენტი აცხადებდა, რომ ამ გზით ამერიკას ტერორიზმისგან დაიცავდა.