ქართველი მოჭადრაკის, ბაადურ ჯობავასა და ნორვეგიელი გროსმაისტერისა და ჭადრაკში ამჟამინდელი მსოფლიო ჩემპიონის, მაგნუს კარლსენის, თამაში სწრაფი ჭადრაკის მსოფლიო ჩემპიონატზე ყაიმით დამთავრდა. მსგავსი შედეგით დამთავრდა ჯობავასა და პოლონელი იან კშიშტოფ დუდას შეხვედრაც.

ჩემპიონატი, რომელიც პოლონეთის დედაქალაქ ვარშავაში იმართება 25 დეკემბრიდან 31 დეკემბრამდე, კვირას დაიწყო. მსოფლიო პირველობის პირველი ხუთი რაუნდი სწორედ 26 დეკემბერს შედგა, რომლის შედეგადაც 4,5 ქულით სამი მოთამაშე — სამი გროსმაისტერი — დაწინაურდა: კარლსენი, დუდა და ჯობავა.

"ჩემი აზრით, საინტერესო თამაში იყო", — აღნიშნავს ჯობავა კარლსენთან ფრედ დამთავრებულ თამაშზე, — "გვერდიდან შეიძლება მოსაწყენი მოგეჩვენოს, მაგრამ დაძაბულობით სავსე შეხვედრა გამოდგა. მან დაწყება გადაწყვიტა, რასაც არ მოველოდი. ვფიქრობ, ასეთ პოზიციაში არასდროს მითამაშია, ამიტომ, ვეცადე, მაქსიმალურად ფრთხილად ვყოფილიყავი. ჩემი აზრით, ორივე მხარისთვის ეს ნორმალური შედეგია".

დუდასა და ჯობავას თამაში.

ფოტო: International Chess Federation

აღსანიშნავია, რომ სანამ კარლსენი მსოფლიო ჩემპიონი გახდებოდა, მას 2010 წელს, ხანტი-მანსიისკის ოლიმპიადაზე უკვე ნათამაშები ჰქონდა ჯობავასთან და ეს შეხვედრა ქართველი მოჭადრაკის გამარჯვებით დასრულდა.

საქართველოს სამგზის ჩემპიონმა ბაადურ ჯობავამ გროსმაისტერის ტიტული 18 წლის ასაკში, 2001 წელს მოიპოვა. რაც შეეხება მსოფლიოს ხუთგზის და სწრაფი ჭადრაკის სამგზის ჩემპიონ კარლსენს, მან გროსმაისტერის ტიტული მხოლოდ 13 წლის ასაკში მიიღო.