დაავადებათა კონტროლის ეროვნული ცენტრის ხელმძღვანელის ინფორმაციით, ამ დროისთვის საქართველოში ომიკრონის 51 შემთხვევაა დადასტურებული. ამირან გამყრელიძის თქმით, ინფიცირებულებს შორის 5 ბავშვია.

"დღევანდელი დღის მონაცემებით, ქვეყანაში გახლავთ 51 შემთხვევა დაფიქსირებული ლაბორატორიულად, როგორც სეკვენირებით, ისე სპეციფიკური PCR ტესტებით. ასევე, კვლევაშია კიდევ რამდენიმე ათეული შემთხვევა. 18 წლამდე ასაკის არის 5, აქედან ერთი არის სტაციონარში, იმას სხვა დაავადებაც აქვს და იმის გამოა სტაციონარში და არა ომიკრონით ინფიცირების გამო", — თქვა გამყრელიძემ.

NCDC-ის ხელმძღვანელი აცხადებს, რომ ზრდა მომავალშიც იქნება. მისივე თქმით, იქნება ყოველკვირეული ანგარიშები, სადაც საერთო დადებითებს შორის ომიკრონის წილი იქნება დათვლილი.

"ჩვენ ყოველკვირეულ ანგარიშს გამოვაქვეყნებთ, თუ რა წილი აქვს ომიკრონს სხვადასხვა შტამის ცირკულაციაში ქვეყანაში. პირველი, ძალიან ნედლი გაანგარიშება გაკეთდა პარასკევს და ომიკრონზე დადებითების წილი საერთო PCR დადებითებში და საერთო დადებითებში გაანგარიშებულ იქნება როგორც 0,6-0,7%. ვნახავთ, ერთი კვირის შემდეგ როგორი ზრდა გვექნება ამ წილისა. დარწმუნებული ვარ, რომ მომავალი 2-3 კვირის განმავლობაში ზრდა გვექნება, მაგრამ თუ ჩვენ დავაკვირდებით სხვა ქვეყნებს, განსაკუთრებით საიდანაც დაიწყო ომიკრონი, რამდენიმე სერიოზული სტატია გამოქვეყნდა უკვე იმაზე, რომ ჯერჯერობით მას მძიმე კლინიკური მიმდინარეობა არ ახასიათებს, რაც დამაიმედებელია. ზრდა, ვადასტურებთ, რომ გვექნება", — თქვა გამყრელიძემ.

ომიკრონის პირველი ორი შემთხვევა საქართველოში 20 დეკემბერს დადასტურდა.

კორონავირუსის ახალი ვარიანტი, ომიკრონი სამხრეთ აფრიკაში 25 ნოემბერს დაფიქსირდა. ჯანდაცვის მსოფლიო ორგანიზაციამ ახალი შტამი შეშფოთების საგნად გამოაცხადა. ომიკრონის გამო ევროკავშირის ქვეყნებმა და ამერიკის შეერთებულმა შტატებმა სამხრეთ აფრიკის ქვეყნებიდან ფრენები აკრძალეს. რეგულაციები დაწესდა საქართველოშიც. უწყებათაშორისი საკოორდინაციო საბჭოს გადაწყვეტილებით, 28 ნოემბრიდან 8 ქვეყნიდან შემოსულ მგზავრებს 14-დღიანი კარანტინის გავლა მოუწევთ.