გირჩი — მეტი თავისუფლების ლიდერი, ზურაბ ჯაფარიძე პრეზიდენტს შევხდა. შეხვედრის შემდეგ მან განაცხადა, რომ სალომე ზურაბიშვილის მიერ დაწყებულ ეროვნული თანხმობის ინიციატივით ქვეყანაში არსებული კრიზისის დაძლევის შანსი არ არის.

მისივე თქმით, დარჩა შთაბეჭდილება, რომ ამ პროცესში ექსპრეზიდენტ მიხეილ სააკაშვილის შეწყალების საკითხი საერთოდ არ განიხილება.

"ამ ქვეყნის უახლოესი წარსულიც გააზრებაც ძალიან მნიშვნელოვანია და ერის კონსოლიდაციაც ძალიან მნიშვნელოვანია, მაგრამ ახლა ქვეყანაში მიმდინარე რა პოლიტიკური კრიზისიც არის, ამ კრიზისის დაძლევის ვერანაირ შანსს ვერ ვხედავ ამ პროცესით", — თქვა მან.

პრეზიდენტმა ეროვნული თანხმობის ინიციატივის პროცესში შეხვედრები დაიწყო. გუშინ, 22 დეკემბერს ის ოპოზიციის რამდენიმე წარმომადგენელს შეხვდა: სალომე სამადაშვილს, ხატია დეკანოიძეს, მამუკა ხაზარაძეს, ბადრი ჯაფარიძეს, ალეკო ელისაშვილს, ლევან იოსელიანს, ანა დოლიძეს, იაგო ხვიჩიას და ვახტანგ მეგრელიშვილს. ნიკა მელიამ აღნიშნა, რომ მომდევნო კვირაში პრეზიდენტს ისიც შეხვდება.

16 დეკემბერს, პრეზიდენტმა, სალომე ზურაბიშვილმა სპეციალურ საახალწლო მიღებაზე, რომელზეც როგორც ხელისუფლება, ისე საპარლამენტო და არასაპარლამენტო ოპოზიციის წარმომადგენლები მიიწვია, ქვეყანაში არსებულ პოლარიზაციაზე ისაუბრა და მისი გადაჭრის გზად სწორედ ერთიანი ძალისხმევა დაასახელა. ზურაბიშვილის განცხადებით, შერიგება ვერ იქნება წინაპირობა, რადგან ის არის შედეგი. მისივე თქმით, პროცესი უნდა დაიწყოს მოსმენით, აზრების გაცვლით, გაგრძელდეს სიმართლის გაგებითა და შემდეგ შეიძლება, საბოლოო მიზანს მიაღწიო.

მანამდე, 10 დეკემბერს, აშშ-ში, დემოკრატიის სამიტზე სიტყვით გამოსვლისას სალომე ზურაბიშვილმა განაცხადა, რომ დაიწყებს ინკლუზიურ პროცესს და ეროვნული მასშტაბის საუბარს, რომელშიც მთელი საზოგადოება იქნება ჩართული. ზურაბიშვილის თქმით, ამით მივაღწევთ უახლესი ისტორიის "საერთო აღქმას" და წავალთ წინ.

მოქმედ პრეზიდენტის გამოეხმაურა ყოფილი პრეზიდენტი, მიხეილ სააკაშვილი და მას ასევე ყოფილი პრეზიდენტის, გიორგი მარგველაშვილის იდეის შესრულება შესთავაზა. საუბარია სამივე პრეზიდენტის შეხვედრაზე. სააკაშვილმა ზურაბიშვილი და მარგველაშვილი გორის სამხედრო ჰოსპიტალში შესახვედრად მიიწვია.

იდეას გამოეხმაურა მარგველაშვილიც, რომელმაც განაცხადა, რომ სამი პრეზიდენტის შეხვედრა სწორად დანახული დინამიკაა.

France 24-თან ინტერვიუში კი ზურაბიშვილმა განაცხადა, რომ აიღო ვალდებულება, შერიგების პროცესის დაწყების.