სახალხო დამცველი, ნინო ლომჯარია სალომე ზურაბიშვილთან შესახვედრად მივიდა. შესვლამდე მან აღნიშნა, რომ ეროვნულ თანხმობაზე პრეზიდენტის ინიციატივა პოზიტიურია.

ომბუდსმენი არ ფიქრობს, რომ შეწყალება ან ამნისტია ამ პროცესის მთავარი აქცენტი უნდა იყოს, თუმცა ამბობს, რომ არ გამორიცხავს ეს საკითხი სხვა თემებთან ერთად იყოს განხილული.

"ძალიან პოზიტიურია, რომ პრეზიდენტმა მიიღო ეს გადაწყვეტილება, რომ დაეწყო ეს პროცესი. მე მაქვს, რა თქმა უნდა, ჩემი ხედვა, ზუსტად, რა თქმა უნდა, არ ვართ ჩამოყალიბებული სახალხო დამცველი რა ფორმით იქნება ჩართული ან ზოგადად, როგორი პროცესი იქნება. თუმცა, როგორც ვიცი, ჯერჯერობით პრეზიდენტი არის კონსულტაციების რეჟიმში, ანუ ისმენს სხვადასხვა აქტორის მოსაზრებებს", — განაცხადა მან.

პრეზიდენტმა ეროვნული თანხმობის ინიციატივის პროცესში შეხვედრები დაიწყო. გუშინ, 22 დეკემბერს ის ოპოზიციის რამდენიმე წარმომადგენელს შეხვდა: სალომე სამადაშვილს, ხატია დეკანოიძეს, მამუკა ხაზარაძეს, ბადრი ჯაფარიძეს, ალეკო ელისაშვილს, ლევან იოსელიანს, ანა დოლიძეს, იაგო ხვიჩიას და ვახტანგ მეგრელიშვილს. ნიკა მელიამ აღნიშნა, რომ მომდევნო კვირაში პრეზიდენტს ისიც შეხვდება.

16 დეკემბერს, პრეზიდენტმა, სალომე ზურაბიშვილმა სპეციალურ საახალწლო მიღებაზე, რომელზეც როგორც ხელისუფლება, ისე საპარლამენტო და არასაპარლამენტო ოპოზიციის წარმომადგენლები მიიწვია, ქვეყანაში არსებულ პოლარიზაციაზე ისაუბრა და მისი გადაჭრის გზად სწორედ ერთიანი ძალისხმევა დაასახელა. ზურაბიშვილის განცხადებით, შერიგება ვერ იქნება წინაპირობა, რადგან ის არის შედეგი. მისივე თქმით, პროცესი უნდა დაიწყოს მოსმენით, აზრების გაცვლით, გაგრძელდეს სიმართლის გაგებითა და შემდეგ შეიძლება, საბოლოო მიზანს მიაღწიო.

მანამდე, 10 დეკემბერს, აშშ-ში, დემოკრატიის სამიტზე სიტყვით გამოსვლისას სალომე ზურაბიშვილმა განაცხადა, რომ დაიწყებს ინკლუზიურ პროცესს და ეროვნული მასშტაბის საუბარს, რომელშიც მთელი საზოგადოება იქნება ჩართული. ზურაბიშვილის თქმით, ამით მივაღწევთ უახლესი ისტორიის "საერთო აღქმას" და წავალთ წინ.

მოქმედ პრეზიდენტის გამოეხმაურა ყოფილი პრეზიდენტი, მიხეილ სააკაშვილი და მას ასევე ყოფილი პრეზიდენტის, გიორგი მარგველაშვილის იდეის შესრულება შესთავაზა. საუბარია სამივე პრეზიდენტის შეხვედრაზე. სააკაშვილმა ზურაბიშვილი და მარგველაშვილი გორის სამხედრო ჰოსპიტალში შესახვედრად მიიწვია.

იდეას გამოეხმაურა მარგველაშვილიც, რომელმაც განაცხადა, რომ სამი პრეზიდენტის შეხვედრა სწორად დანახული დინამიკაა.

France 24-თან ინტერვიუში კი ზურაბიშვილმა განაცხადა, რომ აიღო ვალდებულება, შერიგების პროცესის დაწყების.