პარტია ლელოს დეპუტატმა, ანა ნაცვლიშვილმა პარლამენტის პლენარულ სხდომაზე ქართული ოცნების დეპუტატ ლადო კახაძესა და სხვა კოლეგებს მიმართა, რომ ქალ მინისტრებს "პატარა გოგო, გოგოცუნა" არ უწოდონ, რადგან პარლამენტის ტრიბუნა მსგავსი განცხადებების გაკეთების ადგილი არ არის. მანვე აღნიშნა, რომ ასეთ ეპითეტებს არ იყენებენ კაცი მინისტრების მიმართ.

"ბატონო ლადო, მინდა ძალიან გთხოვოთ თქვენც და ყველა კოლეგას, რომელიმე მამაკაც მინისტრს თქვენ ასე არ მოიხსენიებდით პატარა ბიჭიო, ამიტომ მინისტრებს პატარა გოგო, გოგოცუნა, ასეთი რამეები არ შეშვენით, უნდა მოიხსენიოთ სახელით და გვარით. არ არის პარლამენტის ტრიბუნა მსგავსი განცხადებების გაკეთების ადგილი. ეს ყველამ რომ გავითვაისწინოთ. პატარა გოგოები არ ვართ ჩვენ, არც პატარა ბიჭები ხართ თქვენ", — განაცხადა მან.

ლადო კახაძემ ნაცვლიშვილს უპასუხა, "პატარა ხართ ალბათ და ჯარისკაცის მამა კინო არ გინახიათ". კახაძის თქმით, ქალი მინისტები "შვილების თაობა" არიან და მსგავსი მიმართვები მისი მხრიდან სწორია.

აღსანიშნავია, რომ კახაძე ქალ მინისტრებს ხშირად უწოდებს "ასულს", "სიფრიფანა გოგოს" და მსგავს ტერმინებს. აქამდე მინისტრის საათის ფარგლებში დეპუტატმა კულტურის მინისტრი თეა წულუკიანი და ეკონომიკის მინისტრი ნათია თურნავა სწორედ მსგავსი სიტყვებით "შეაქო", დღეს კი იგივე ტერმინი გამოიყენა ყოფილი ჯანდაცვის მინისტრის, ეკატერინე ტიკარაძის მისამართითაც.