დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორის, ამირან გამყრელიძის შეფასებით, კორონავირუსის ომიკრონის შტამს არსებული დელტა შტამის ჩასანაცვლებლად ორი თვე მაინც დასჭირდება. ის ამბობს, ეპიდვითარება, როგორც მინიმუმ, ახალ წლამდე სტაბილურად შენარჩუნდება.

"ახალი შტამით ჩანაცვლება ძველი დელტა შტამისა, ალბათ, ორი თვე მაინც დასჭირდება, დაახლოებით. ვნახოთ, დავაკვირდეთ. ამიტომ, სიტუაციის სწრაფ გაუარესებას, იმის გამო, რომ ომიკრონი ქვეყანაში დაფიქსირდა, ნამდვილად გეტყვით, რომ არ ველოდებით. ყოველ შემთხვევაში, ახალ წლამდე.

შემდგომ, ნელ-ნელა თუ გავრცელდა იმ სისწრაფით, რა სისწრაფეც ომიკრონს ახასიათებს, რა თქმა უნდა, დატვირთვა იქნება ჯანდაცვის სექტორზე. მაინც იმედი გვაქვს, რომ ძირითადად, შემთხვევების ნაწილი უნდა იყოს ამბულატორიული", — განაცხადა ამირან გამყრელიძემ.

მან ისაუბრა იმ ძირითად მახასიათებლებზე, რაც ომიკრონის შტამს ახასიათებს.

"აღინიშნა საკმაოდ სწრაფი გადადების უნარი ამ შტამისთვის, იმიტომ, რომ დაახლოებით 3-4-ჯერ უფრო სწრაფად ვრცელდება. უფრო ადვილად აზიანებს ახალგაზრდა ასაკს, მხედველობაში მაქვს 40 წლამდე ასაკი და ასევე ბავშვებს. ახასიათებს — ჯერჯერობით რაც არის გამოვლენილი შემთხვევებით და დღევანდელი რიცხვით, 90-ზე მეტ ქვეყანაშია დაფიქსირებული — შედარებით მსუბუქი მიმდინარეობა. მომავალში ეს როგორ განვითარდება, რადგან მას სწრაფი გავრცელების და ადვილი გადადების უნარი აქვს, ჯერ კიდევ რთულია [პროგნოზირება]", — ამბობს გამყრელიძე.

დღეს მან ასევე განაცხადა, რომ ქვეყანაში უკვე კორონავირუსის ახალი შტამის, ომიკრონის 2 ახალი შემთხვევა დადასტურდა. გამყრელიძის თქმით, ორივე მათგანი საქართველოს მოქალაქეა და მათ მოგზაურობის ისტორია აქვთ. ერთს ამერიკის შეერთებულ შტატებში, მეორეს კი დუბაიში.