გირჩი — მეტი თავისუფლების ლიდერის, ზურაბ ჯაფარიძის საპარლამენტო მანდატის დატოვების გამო, რეფორმების ჯგუფის ფრაქცია პოლიტიკური ჯგუფი გახდა. მას საპროცედურო და წესების კომიტეტმა დაუჭირა მხარი. მათი დასკვნა რეფორმების რეგისტრაციაზე პარლამენტის ბიუროს გადაეგზავნება.

კომიტეტის თავმჯდომარის, გურამ მაჭარაშვილის განცხადებით, აპარატმა შეისწავლა საკითხი და დაადგინა, რომ წარდგენილი დოკუმენტაცია კანონმდებლობასთან შესაბამისობაშია. რეფორმების ჯგუფი 5 წევრისგან შედგება. ფრაქციაში გიორგი ვაშაძე, თეონა აქუბარდია, პაატა მანჯგალაძე, ხათუნა სამნიძე და ტარიელ ნაკაიძე არიან.

პარლამენტის რეგლამენტის მიხედვით, პოლიტიკური ჯგუფისა და საპარლამენტო ფრაქციის, ასევე, მათი თავმჯდომარეების უფლებამოსილებები მსგავსია. ძირითადი განსხვავება იმაშია, რომ პოლიტიკური ჯგუფი შეიძლება შედგებოდეს მინიმუმ 2 ადამიანისგან, როცა ფრაქციისთვის მოთხოვნა მინიმუმ 7 დეპუტატია. ამასთან, პოლიტიკური ჯგუფის თავმჯდომარეს უფლება არ აქვს, ეკავოს საპარლამენტო თანამდებობა და ჰყავდეს მოადგილე.

ფრაქცია შარლ მიშელის რეფორმების ჯგუფმა სახელი პირველ ნოემბერს შეიცვალა და რეფორმების ჯგუფად გადაკეთდა. როგორც ფრაქციის წარმომადგენლები On.ge-სთან განმარტავდნენ, სახელის ცვლილებაზე საუბრები ფრაქციაში არჩევნების მეორე ტურამდე ჰქონდათ. მიზეზად მათ რეფორმების სპექტრის გაფართოება დაასახელეს. ზურაბ ჯაფარიძეს მანდატი პარლამენტმა მისივე მოთხოვნის საფუძველზე 16 ნოემბერს შეუწყვიტა.