ჰარი პოტერი და ფილოსოფიური ქვის პირველი გამოცემის ეგზემპლარი აუქციონზე $471 ათასად გაიყიდა. Heritage Auctions-ზე გაყიდული წიგნი ერთ-ერთია იმ 500 მაგარყდიანი ეგზემპლარიდან, რომელიც 1997 წელს დაიბეჭდა გაერთიანებულ სამეფოში.

აუქციონზე ფსონების მიღება $75 ათასიდან დაიწყო, თუმცა, მალევე გაიზარდა და ათი ათასების თანრიგიდან ასი ათასებში გადავიდა.

"ამგვარად ეს მე-20 საუკუნეში გამოცემული ყველაზე ძვირადღირებული მხატვრული ლიტერატურაა, რომელიც გაიყიდა", — ამბობს აუქციონის ორგანიზატორი, — "ეს შედეგი კი აჩვენებს, რა ძალა აქვს ლიტერატურისა და კინოს კომბინაციას".

აღსანიშნავია, რომ ეს ყველაზე მაღალი ღირებულებაცაა, რომლითაც ჰარი პოტერის გამოცემა ოდესმე შეფასებულა. აქამდე ყველაზე ძვირადღირებულად 2021 წლის დასაწყისში, $138 ათასად გაყიდული ფილოსოფიური ქვა მიიჩნეოდა.

თუმცა, აუქციონზე ჰარი პოტერის გარდა სხვა ნაწარმოებების პირველი გამოცემების კიდევ 70 ეგზემპლარი იყო გასაყიდად გამოტანილი. მათ შორის ერთ-ერთი, ჯ. რ. რ. ტოლკინის ბეჭდების მბრძანებლის ტრილოგია, $103 ათასად გაიყიდა, კ. ს. ლუისის ნარნიის ქრონიკების შვიდივე წიგნი კი, საბოლოოდ, $100 ათასად შეფასდა.

ფოტო: Gareth Davies / Getty Images

წელს ჰარი პოტერის საგის პირველი ფილმის გამოსვლიდან 20 წელი გავიდა. ამ განსაკუთრებული თარიღის აღსანიშნავად, საიუბილეო გადაცემა, ჰოგვორტსში დაბრუნება, მომზადდა, რომლის პრემიერაც 2022 წლის პირველ იანვარს შედგება.

ჰარი პოტერის წიგნების სერია, რომელიც შვიდ წიგნს მოიცავს და 1997 წლიდან 2007 წლამდე გამოიცემოდა, დღემდე მიიჩნევა ყველა დროის ყველაზე გაყიდვად საგად მსოფლიოში — ამ დრომდე სერიის წიგნების 500 მილიონზე მეტი ეგზემპლარია გაყიდული. წიგნების მიხედვით გადაღებულმა 8 ფილმის შემოსავალმა კი ჯამში $7,7 მილიარდს გადააჭარბა.

ნახეთ ჩვენი ყველა მასალა ჰარი პოტერზე.