ქართული ოცნების დეპუტატი, გურამ მაჭარაშვილის თქმით, დღის წესრიგში არ დგას მიხეილ სააკაშვილის "უცხოეთის კურორტებზე გაგზავნის საკითხი". ასე გამოეხმაურა დეპუტატი ექიმთა ნაწილის განცხადებებს, რომ საჭიროა ექსპრეზიდენტის უცხოეთში გადაყვანა სამკურნალოდ.

"ნამდვილად არ გვაქვს დღის წესრიგში პატიმარ სააკაშვილის უცხოეთის კურორტებზე გაგზავნის საკითხი. იმიტომ, რომ ეს საკითხი დღის წესრიგში არ დასვა საქართველოს საზოგადოებამ. კიდევ ერთხელ, ყველა პატიმრის და მათ შორის, პატიმარ სააკაშვილის ჯანმრთელობის მდგომაროება კონტროლდება და გამომდინარე აქედან, არ მგონია, რომ დამატებითი კომენტარები იყოს ამასთან დაკავშირებით საჭირო.

არ აინტერესებს საზოგადოებას მისი არც მენიუ, არც მედიკამენტების ჩამონათვალი. მთავარია იყო ის, რომ ჯანმრთელობის მდოგმაროება ყოფილიყო კონტროლის ქვეშ, რაც უკვე არის", — განაცხადა მაჭარაშვილმა.

12 დეკემბერს ცენტრ ემპათიის ნევროლოგმა, ოთარ თოიძემ განაცხადა, რომ სააკაშვილისთვის საჭიროა სპეციალიზებული დაწესებულება, რომლის მოძიება საქართველოში ვერ მოხერხდა. როგორც თოიძემ აღნიშნა, მესამე პრეზიდენტის ნევროლოგიური სტატუსი მის დაავადებაში წამყვანია.