საქართველოს მეოთხე პრეზიდენტ გიორგი მარგველაშვილს მიაჩნია, რომ მიხეილ სააკაშვილის შეწყალება, პრეზიდენტი რომ იყოს, არაადეკვატურ ჩარევა იქნება იმ პროცესში, რომელიც სააკაშვილმა თვითონ აირჩია. ამიტომ მთავარი არხის დამფუძნებლის და მიხეილ სააკაშვილის ადვოკატის ნიკა გვარამიას პირობით კითხვას შეიწყალებდა თუ არა, პასუხობს, რომ არაჰგონია.

"არა მგონია... მე ხომ არ შემიწყალებია მიშა, მიუხედავად იმისა, რომ ის საქმეები, რომლებზეც მიშას ასამართლებდნენ, ვთქვი, რომ აბსურდია-მეთქი. პიჯაკებზეც ვთქვი, რომ აბსურდია და შეწყალებაზეც ვთქვი, რომ აბსურდია. ვითარება შეიცვალა, მიშა არ იყო ციხეში და არ იყო მოშიმშილე, თუმცა ეს შიმშილიც და აქ ყოფნაც მისი პოლიტიკური გზა არის. ჩემ მიერ მისი შეწყალება, პრეზიდენტი რომ ვიყო, მიმაჩნია არაადეკვატურ ჩარევად იმ პროცესში, რომელიც ამ კაცმა თვითონ აირჩია და რომელსაც გადის", — განაცხადა მარგველაშვილმა მთავარი არხის ეთერში.

პრეზიდენტი სალომე ზურაბიშვილი აცხადებს, რომ მიხეილ სააკაშვილს არ შეიწყალებს. პრეზიდენტის განცხადებით, აზრს არასდროს შეიცვლის და ამის მიზეზი სააკაშვილის ჩადენილი დანაშაულებებია.

უკრაინაში მცხოვრები ექსპრეზიდენტი მიხეილ სააკაშვილი საქართველოში სექტემბრის ბოლოს, საარჩევნოდ დაბრუნდა, რომლის შემდეგაც ის პირველ ოქტომბერს დააკავეს. დაკავების პირველივე დღიდან მან შიმშილობა გამოაცხადა. შიმშილობა გაგრძელდა გლდანის მე-18 დაწესებულებაშიც, სადაც მისი განცხადებით, მოტყუებითა და იძულებით გადაიყვანეს. სააკაშვილმა შიმშილობა მას შემდეგ შეწყვიტა, რაც იუსტიციის სამინისტრომ გორის სამხედრო ჰოსპიტალში გადაყვანა შესთავაზა. ექსპრეზიდენტი რუსთავის პენიტენციური დაწესებულებიდან გორის სამხედრო კლინიკაში 19 ნოემბერს, 50-დღიანი შიმშილობის შემდეგ გადაიყვანეს.