ორი დღის განმავლობაში გაუჩინარებული დეპუტატი, რამიზ რამაზანოვი დმანისში საკრებულოს სხდომაზე გამოცხადდა. ის ენმ-ს დეპუტატი იყო, თუმცა ახლა ამბობს, რომ დამოუკიდებელო დეპუტატად ყოფნა გადაწყვიტა, რადგან "ასეა საჭირო".

"ზეწოლა არ ყოფილა, ასე გადავწყვიტე მე, პირადად. მე გადავწყვიტე დამოუკიდებელი დეპუტატი გავხდე, საკრებულოს წევრი. იმიტომ, რომ საჭიროა, ათასმა კაცმა ხმა რომ მომცა, იმ ხალხის წინაშე ვალდებული ვარ. ასეა საჭირო. ადამიანი ხომ რაღაცა ფიქრობს, ფიქრობს ბოლო გადაწყვეტილებას", — თქვა მან.

დმანისში ოპოზიცია ბოიკოტს აცხადებდა. რამაზანოვის ამ გადაწყვეტებით კი საკრებულოში ქვორუმი შედგა და სხდომის ჩატარება შესაძლებელი გახდა.

დმანისის მუნიციპალიტეტი ერთ-ერთია, სადაც 3 დეკემბერს საკრებულოს პირველი სხდომა ჩაიშალა და თავმჯდომარე ვერ აირჩიეს. სხდომას ქართული ოცნების 15 დეპუტატი ესწრებოდა, ქვორუმისთვის კი 16 დეპუტატის მონაწილეობა იყო საჭირო.

რამაზანოვის დაკარგვის შესახებ ინფორმაცია 8 დეკემბერს საკრებულოს ოპოზიციონერმა წარმომადგენლებმა გაავრცელეს. მათი თქმით, რამაზანოვს სახელმწიფო უსაფრთხოები სამსახური დაჭერით ემუქრებოდა, შემდეგ კი მათთვის გაურკვეველმა პირებმა წაიყვანეს და მისი ადგილსამყოფელის შესახებ ინფორმაცია არ ქონდათ. საკრებულოს წევრმა, ლევან მოსაშვილმა განაცხადა, რომ რამაზანოვი ორი კვირის წინ სკოლის დირექტორის პოზიციიდან გაათავისუფლეს.

საკრებულოს კიდევ ერთი წევრი, ჰუსეინ ისმაილოვი ამბობს, რომ ბოლოს საუბრისას რამაზანოვმა მას უთრა: "ისეთ მდგომარეობაში ვარ, ან უნდა შევიდე, ან თავი უნდა მოვიკლაო". მისივე თქმით, მთელი დღის განმავლობაში მასთან კონტაქტზე გასვლას ვერ ახერხებენ, რადგან სატელეფონო ზარებს არ პასუხობს.

9 დეკემბერს კი არასამთავრობო ორგანიზაციები ხელისუფლებას მოუწოდეს რამიზ რამაზანოვის ღირსება, უსაფრთხოება და სახლში დაბრუნება უზრუნველყოთ. ისინი რამაზანოვის გარშემო მიმდინარე პროცესებს შემაშფოთებელს უწოდებდნენ. დეპუტატს ოჯახის წევრები და ოპოზიციის წარმომადგენლები მე-2 დღეა ეძებდნენ.