ახალი ზელანდია მომავალი თაობისთვის მოწევის აკრძალვას აპირებს. ახალი საკანონმდებლო ინიციატივის მიხედვით, თამბაქოს შეძენის უფლების მისაღებად საჭირო ასაკი, რომელიც ამჯერად 18 წელია, თანდათანობით გაიზრდება.

"გვინდა დავრწმუნდეთ, რომ მომავალი თაობა მოწევას არასდროს დაიწყებს, ამიტომაც თამბაქოს პროდუქციის შემოტანა და გაყიდვა აკრძალული იქნება. ადამიანები, რომლებიც კანონის მიღების მომენტში 14 წლის იქნებიან, კანონიერად თამბაქოს შეძენას ვერასდროს შეძლებენ", — განაცხადა ქვეყნის ჯანდაცვის მინისტრმა.

მთავრობა კანონპროექტს პარლამენტს 2022 წელს წარუდგენს. ახალი ზელანდია გეგმავს, მომდევნო 4 წელიწადში ქვეყანა თამბაქოსგან სრულიად თავისუფალი იყოს.

ახალი ზელანდიის ოფიციალური მონაცემების მიხედვით, ზრდასრული მოსახლეობის 13,4 პროცენტი მწეველია. ყოველწლიურად თამბაქოს მოხმარებასთან დაკავშირებული დაავადებებისგან 4 000-დამ 5 000-მდე ადამიანი კვდება.

ახალი კანონი ისეთ ღონისძიებებსაც გაითვალისწინებს, რომლებიც ადამიანებს მოწევისთვის თავის დანებებაში დაეხმარება. მაგალითად, თანდათანობით შემცირდება სიგარეტში ნიკოტინის დასაშვები ზღვარი და სიგარეტით მოვაჭრე მაღაზიების რაოდენობა, ასევე, გამკაცრდება თამბაქოს რეკლამებთან დაკავშირებული რეგულაციები. ქვეყანა ადიქციასთან გამკლავების სერვისებს უფრო ხელმისაწვდომს გახდის.

ახალ კანონპროექტს ჯანდაცვის სფეროს წარმომადგენლები დიდი ენთუზიაზმით შეხვდნენ, თუმცა იდეას მხარდამჭერების გარდა, კრიტიკოსებიც ჰყავს. კრიტიკოსები თვლიან, რომ ნიკოტინის დოზის შემცირება უარყოფითად აისახება ნაკლები შემოსავლის მქონე მწეველებზე, რომელთაც ძველი დოზის მისაღებად მეტი თამბაქოს ყიდვა მოუწევთ. ბევრი იმასაც შიშობს, რომ თამბაქოს აკრძალვა შავ ბაზარზე მის უკანონო შემოტანას შეუწყობს ხელს.