კოვიდინფიცირებულთან კონტაქტის შემდეგ კლუბში წასვლის გამო, ფინეთის პრემიერმინისტრმა, სანა მარინმა ბოდიში მოიხადა. ამის შესახებ CNN წერს და აღნიშნავს, რომ პრემიერმა საჯარო განცხადება მას შემდეგ გააკეთა, რაც კლუბიდან მისი ფოტოები გავრცელდა.

"შეცდომა დავუშვი, სიტუაცია უფრო ფრთხილად უნდა შემეფასებინა", — აღნიშნა მან.

უცხოური მედიების ცნობით, მარინი საგარეო საქმეთა მინისტრის კონტაქტი იყო, რომელსაც კორონავირუსი შაბათს დაუდასტურდა. BBC-ის ცნობით, პრემიერმინისტრს უთხრეს, რომ იზოლაცია არ სჭირდებოდა, რადგან სრულად ვაქცინირებული იყო.

მარინის თქმით, მოგვიანებით ტელეფონზე მოუვიდა შეტყობინება, სადაც დისტანციის დაცვის რეკომენდაციის შესახებ ეწერა. მისი თქმით, მას ეს ტექსტი არ უნახავს, რადგან სამსახურის მობილურზე გაუგზავნეს, რომელიც სახლში ჰქონდა დატოვებული. BBC-ის ცნობით, მან კორონავირუსის ტესტი უკვე ჩაიტარა და პასუხი უარყოფითია.