კალათბურთის ფედერაციის მოქმედმა პრეზიდენტმა, პაატა გურასპაულმა ახალი პრეზიდენტის არჩევნებში კანდიდატურა დეპუტატ ვიქტორ სანიკიძის სასარგებლოდ მოხსნა. ამის შესახებ ერთობლივი განცხადება გურასპაულმა და სანიკიძემ დღეს, სპეციალურ ბრიფინგზე გააკეთეს.

"ჩვენ დავსხედით, ვისაუბრეთ, შევთანხმდით. უმრავლეს შემთხვევაში საერთო ხედვები გვაქვს განვითარებასთან დაკავშირებით და გადავწყვიტეთ, რომ მომავალ საპრეზიდენტო არჩევნებში ჩვენ წარვდგებით ერთი გუნდით. იმ გუნდით, რომელსაც კალათბურთის მომავალი და კალათბურთის სიმშვიდე, სიწყნარე და განვითარება უნდა", — განაცხადა გურასპაულმა.

ვიქტორ სანიკიძემ განაცხადა, რომ ფედერაციაში დაპირისპირება არ არის და ამას გურასპაულის ეს გადაწყვეტილებაც ადასტურებს.

"იმ დღიდან, როდესაც მე დავრეგისტრირდი კანდიდატად, ბევრი კითხვები იყო — რამე ხომ არ ხდება ქართულ კალათბურთში, იქვე ხაზგასმით ვთქვი და პირობა დავდე, რომ არამცდაარამც არ მოხდება რაიმე დაპირისპირება. დღევანდელი დღეც არის მაგალითი იმისა, რომ ჩვენ ერთი გუნდი ვართ", — ამბობს სანიკიძე.

აღსანიშნავია, კანდიდატურის მოხსნამდე გურასპაული და სანიკიძე მთავრობის ადმინისტრაციაში, პრემიერმინისტრ ირაკლი ღარიბაშვილს ესაუბრნენ. შეხვედრა გუშინ, 7 დეკემბერს გაიმართა და მას ასევე ესწრებოდნენ FIBA-ევროპის ბორდის წარმომადგენელი და სპორტის მინისტრი, თეა წულუკიანი. შეხვედრის შემდეგ ღარიბაშვილმა განაცხადა, რომ მთავრობა კალათბურთის განვითარებისთვის 100 მილიონ ლარს გამოყოფს. ბრიფინგზე როგორც გურასპაულმა, ისე სანიკიძემ მადლობა გადაუხადეს მთავრობას.

ყოფილი კალათბურთელი და ქართული ოცნების მოქმედი დეპუტატი, ვიქტორ სანიკიძე კალათბურთის ფედერაციის საპრეზიდენტო არჩევნებში 30 ნოემბერს დარეგისტრირდა. მოქმედმა პრეზიდენტმა, პაატა გურასპაულმა არჩევნებში მონაწილების შესახებ განცხადება სანიკიძეს დარეგისტრირებიდან მეორე დღეს, 1-ელ დეკემბერს შეიტანა.

კალათბურთის ფედერაციის პრეზიდენტის არჩევნები 2021 წლის 11 დეკემბერს გაიმართება.