KHIDI-ს დამფუძნებელი, თამუნა აქსანდერი აცხადებს, რომ შრომის ინსპექციის დაკისერებული 10 000-ლარიანი ჯარიმის გადახდას არ აპირებს და გადაწყვეტილებას სასამართლოში გაასაჩივრებს. მისივე თქმით, კლუბს ლუქს მოხსნის.

"ჯარიმის გადახდას არ ვაპირებ და ლუქის მოხსნას ვაპირებ რაც შეიძლება მალე. დღესვე გავასაჩივრებთ. მოლოდინი მაქვს, რომ გააკეთებენ იმას, რაც საჭიროა", — აცხადებს ის.

შრომის ინსპექციამ კლუბი KHIDI 5 დეკემბერს დააჯარიმა და დალუქა. მიზეზად ადგილზე "აკრძალული მასობრივი ღონისძიების ფაქტის გამოვლენა" დაასახელეს. მათი განცხადებით, კლუბის ხელმძღვანელობამ მხედველობაში არ მიიღო ის, რომ საქართველოს მთავრობის N322 დადგენილების შესაბამისად, მასობრივი გასართობი თუ სოციალური ღონისძიებების განხორციელება კვლავ აკრძალვად რჩება.

KHIDI-ს დამფუძნებლის განცხადებით კი შრომის ინსპექციამ კლუბი მისი ინფორმირების გარეშე დალუქა. როგორც მან Facebook-ზე დაწერა, მხოლოდ პოსტფაქტუმ დაურეკეს.

დალუქვამდე კი კლუბმა განაცხადა, რომ ესკალაციის თავიდან აცილების მიზნით, კლუბს დატოვებდნენ, თუმცა პასუხისმგებელ პირებს მათი მუშაობის დაშვებისთვის გონივრულ ვადას აძლევდნენ. როგორც კლუბის მიერ გავრცელებულ განცხადებაში იყო აღნიშნული, წინააღმდეგ შემთხვევაში "მხოლოდ წინააღმდეგობას მიიღებენ".

მათი თქმით, ღონისძიება 3 დეკემბერს, 21-თვიანი პაუზის შემდეგ გამართეს, რეგულაციებს მკაცრად იცავდნენ და იქ მხოლოდ მწვანე პასპორტის მქონე პირები დაიშვებოდნენ.