პროკურორების მოთხოვნის პასუხად მოსამართლე ბადრი კოჭლამაზაშვილმა განაცხადა, რომ ექსპრეზიდენტ მიხეილ სააკაშვილს პოლიტიკური განცხადებების გაკეთების საშუალება იქნება და ასეთი საქმის დროს დაუშვებელია, ბრალდებულს ეს უფლება არ მისცე. მისივე თქმით, სააკაშვილი შეძლებს მიმდინარე საქმეზე პოზიციის დაფიქსირებასაც და თუ თავად არ ექნება სურვილი, არ უპასუხებს პროკურორების კითხვებს, რადგან ჯერ ჩვენებაზე თანხმობა არ მიუცია.

"ჩვეულებრივ მიმდინარე სისხლის სამართლის საქმის ფარგლებში, ჩვენ ბრალდებულს ნამდვილად არ ვაძლევთ პოლიტიკური განცხადების გაკეთების საშუალებას, მაგრამ ამ შემთხვევაში ეს ასე ვერ იქნება გაგებული და გეტყვით რატომ — ყველაფერს აქვს თავისი ახსნა, გადახვევასაც თავისი ახსნა უნდა ჰქონდეს და არ გადახვევასაც თავისი ახსნა უნდა ჰქონდეს.

ახლა ეს გადახვევა რატომ იქნება დაშვებული, როდესაც ბრალდებული პირი აქტიური პოლიტიკური ფიგურაა, როდესაც ის მსჯელობს იმაზე, მისი დაცვის მხარე ყოველ შემთხვევაში, რომ მას პოლიტიკური ნიშნით დევნიან, როდესაც მას წარდგენილი აქვს ბრალდება მისი სამსახური მდგომარეობის გამოყენებით და ეს მდგომარეობა გახლავთ მისი პრეზიდენტობის პერიოდი და პრეზიდენტობა გახლავთ უმაღლესი პოლიტიკური თანამდებობა, ასეთ დროს ბრალდებულს არ მისცე პოლიტიკური განცხადებების გაკეთების საშუალება, ეს ყოვლად დაუშვებელია.

ამიტომ მას პოლიტიკური განცხადებების გაკეთების შესაძლებლობაც ექნება, ბრალდების ირგვლივ პოზიციის დაფიქსირების შესაძებლობაც ექნება და ამვდროულად ის კითხვებს არ უპასუხებს, რადგან მას არ უთქვამს ჯერ, რომ ჩვენების მიცემას აპირებს", — განაცხადა მან.

ამ წუთებში თბილისის საქალაქო სასამართლოში, მოსამართლე ბადრი კოჭლამაზიშვილი ე.წ. პიჯაკების საქმეს განიხილავს. სააკაშვილს ბრალი ედება სამსახურებრივი მდგომარეობის გამოყენებით, წინასწარი შეთანხმებით, პირთა ჯგუფის მიერ დიდი ოდენობით სახელმწიფო ქონების, კერძოდ 9 მილიონ 24 ათას 667 ლარის გაფლანგვაში, რისთვისაც სასჯელის სახით გათვალისწინებულია თავისუფლების აღკვეთა 7-დან 11 წლამდე.

ადვოკატებმა საქმის პროკურორის აცილება მოითხოვეს, რაც მან არ დააკმაყოფილა.

პარალელურად, საქალაქო სასამრთლოსთან ექსპრეზიდენტის მხარდამჭერების აქცია იმართება. ადგილზე მობილიზებულია პოლიცია.