გლდანის ციხეში პატიმარი გარდაიცვალა. ფაქტზე სახელმწიფო ინსპექტორის სამსახურმა გამოძიება დაიწყო. მათი განცხადებით, გამოძიება პენიტენციური დაწესებულების მომსახურების მხრიდან განხორციელებულ სავარაუდო სამსახურეობრივ გულგრილობაზე მიმდინარეობს.

"პენიტენციური სამსახურიდან შემოსული შეტყობინების საფუძველზე, სახელმწიფო ინსპექტორის სამსახურის საგამოძიებო დეპარტამენტში დაიწყო გამოძიება სისხლის სამართლის საქმეზე პენიტენციური დაწესებულების მომსახურების მხრიდან განხორციელებული სამსახურეობრივი გულგრილობის სავარაუდო ფაქტზე, რამაც სპეციალური პენიტენციური სამსახურის #8 დაწესებულებაში მოთავსებული პატიმრის სიცოცხლის მოსპობა გამოიწვია", — აღნიშნულია განცხადებაში.

პენიტენციურ სამსახურში On.ge-ს განუცხადეს, რომ გარეგნული დათვალიერებით პატიმარს ძალადობის ნიშნები არ აღენიშნება.

გარდაცვლილის ადვოკატის, ჯაბა კოჭლამაზიშვილის განცხადებით, ციხეში შესვლაზე ინსპექტორის სამსახურის ნებართვა აქვს, თუმცა, დაცვა იქ შესვლის საშუალებას ამ დრომდე არ აძლევს.

"ვდგავარ ციხის წინ და არ მიშვებენ შემთხვევის ადგილზე. მე მაქვს ამის სრული უფლება, ჩემ გარდა ამ ადამიანს აქ არავინ არ ჰყავს. დამირეკეს, მითხრეს, რომ გარდაცვლილია ადამიანი და სახელმწიფო დაცვის ინსპექტორის სამსახური მიშვებს შიგნით, არ მიშვებს ციხის ადმინისტრაცია რაღაც დებულებების გამო", — ამბობს ის.

მისივე თქმით, პატიმარს სამარტოო საკანში სურდა გადასვლა და მიზეზად ხმაურს ასახელებდა. კოჭლამაზაშვილი აღნიშნავს, რომ პატიმარს მასთან რამე ტიპის დაპირისპირებაზე არ უსაუბრია.

ინსპექტორის სამსახური მომხდარს სისხლის სამართლის კოდექსის 342-ე მუხლის მე-2 ნაწილით იძიებს.