უფროს თაობასთან და მათი გავლენით ზოგჯერ ახალ თაობაშიც სექსსა და სექსთან დაკავშირებულ საკითხებზე საუბარი ჯერ კიდევ უხერხულობას იწვევს. მხოლოდ სიტყვის ხსენებაც კი გაწითლების, კოდური ფრაზების გამოყენებისა და ხშირად გაღიზიანების საფუძველიც ხდება. ამის გამო მოზარდები უფროსებისგან უსაფრთხო სექსზე, საკუთარ სხეულსა და სხვა მნიშვნელოვან საკითხებზე აუცილებელ ინფორმაციას ან საერთოდ ვერ იღებენ, ან ხელში დამახინჯებული ფაქტები რჩებათ.

მსგავსი ტაბუს არსებობა კიდევ უფრო გვიმძაფრებს ისედაც ბუნებრივ მოლოდინს, რომ ამ თემაზე პროფესიონალი მაინც, ამ შემთხვევაში კი — გინეკოლოგი, თავისუფლად გაგვესაუბრება და ჩვენს კითხვებს ამომწურავ პასუხებს ხმამაღლა, თამამად და გასაგებად გასცემს.

სამწუხაროდ, ხანდახან ჩვენი მოლოდინი არ მართლდება და გინეკოლოგი სექსუალურ ცხოვრებაზე თამამად საუბრისა და აუცილებელი რჩევების მოცემის ნაცვლად, გაურკვეველ კითხვებს გვისვამს ისე, რომ სიტყვა სექსსაც კი არ ახსენებს. პროფესიონალისგან მსგავსი მიდგომა კი სტერეოტიპებს კიდევ უფრო აღრმავებს და პაციენტსაც უხერხულობას უქმნის. უხერხულობა კი ხშირად სასურველი კითხვების დასმისგან თავის შეკავებას გვაიძულებს.

გინეკოლოგების მიერ სექსზე ღიად საუბრისგან თავის შეკავება, რა თქმა უნდა, მნიშვნელოვანი პრობლემაა. ამის მიუხედავად, მათი მცდელობა, უხერხულობა თავიდან აიცილონ (რაც, თავის მხრივ, უფრო დიდ უხერხულობას იწვევს) უამრავი სახალისო ფრაზის გამოგონებით მთავრდება. ამ კოდურ ფრაზებს გინეკოლოგები იმის გასაგებად იყენებენ, აქვს თუ არა სექსი პაციენტს.

რა თქმა უნდა, სტატიაში აღწერილი პრობლემა ყველა გინეკოლოგზე არ ვრცელდება. შესაბამისად, ჩამოთვლილ ფრაზებსაც მხოლოდ გინეკოლოგების ნაწილი იყენებს. თუ ამ ფრაზებიდან არცერთი გეცნობა, გილოცავთ — საქმე ნამდვილ პროფესიონალებთან გქონია. ამის მიუხედავად, სამწუხაროდ, გარანტიას ვერ მოგცემთ, რომ ამ ფრთიან ფრაზებს მომავალშიც გადაურჩები.

მაშ ასე, გთავაზობთ 7 აბსურდულ ფრაზას სექსის შესახებ, რომელსაც გინეკოლოგთან მოისმენ:

1. გათხოვილი ხარ?

კლასიკური კითხვაა. ამას უკვე შევეჩვიეთ. თუ გათხოვების ხსენებისას გონებაში მხოლოდ ქორწინების მოწმობა გიტრიალებს, კარგად დაფიქრება გმართებს!

2. გათხოვილი ხარ თუ ქალიშვილი?

ეს კითხვა პირველი კითხვის უფრო გართულებული და კატეგორიული ვერსიაა. ის ცალკე გამოყოფას იმსახურებს, რადგან ხშირად ბონუსად გინეკოლოგის ეჭვნარევი მზერაც მოყვება. ამ კითხვის ავტორი თვლის, რომ ან გათხოვილი ხარ, ან სექსი არასდროს გქონია — ოქროს შუალედი არ არსებობს!

3. ლოგინი გაქვს?

თუ ამ კლასიკად ქცეულ კითხვას მოისმენ, გახსოვდეს, რომ შენი ახლად შეძენილი ავეჯი არავის აინტერესებს!

4. ცხოვრობ?

ამ შემთხვევაშიც ცხოვრებაში რატომღაც სექსი იგულისხმება. თუ სახლში ქმართან ერთად ცხოვრობ, გინეკოლოგი კი დროებით ქმართან ცხოვრებისგან თავის შეკავებას გირჩევს, ალბათ, უკვე მიხვდებოდი, რომ ახალი სახლის ძებნა არ გჭირდება.

5. მეგობარი გყავს?

თუ გინეკოლოგმა მეგობრებზე ლაპარაკი დაგიწყო, პლატონურ ურთიერთობებზე ანდაზების გახსენება არ ღირს, რადგან ამ უწყინარი კითხვით გინეკოლოგს იმის გაგება უნდა, გაქვს თუ არა სექსი.

6. კაცი იცი?

წინა შემთხვევების ნაცვლად, ამ დროს გინეკოლოგს კაცების შესახებ შენი ცოდნის ნაცვლად შენი სექსუალური ცხოვრება აინტერესებს, ამიტომ არ დაიბნე.

7. ურთიერთობ?

ეს ყველაზე უწყინარი კითხვაა, რადგან შედარებით მარტივად მისახვედრია, რომ გინეკოლოგი შენი სექსუალური ცხოვრებითაა დაინტერესებული და პარტნიორთან შენი მიმოწერა და საუბარი ნაკლებად აინტერესებს. მიუხედავად ამისა, კითხვის უფრო მკაფიოდ დასმა სტერეოტიპების დამსხვრევას შეუწყობს ხელს.

ეს მხოლოდ მცირე ჩამონათვალია იმ კითხვებისა, რომელთა მოსმენაც გინეკოლოგის კაბინეტში შეიძლება. ამ პრობლემის მოსაგვარებლად სტერეოტიპების დამსხვრევაა საჭირო. ზოგჯერ გინეკოლოგები მსგავს ფრაზებს იმიტომ იყენებენ, რომ ეშინიათ, პაციენტი არ გაანაწყენონ, ამიტომ გირჩევთ, არ მოგერიდოს და შენი პრობლემებისა და მდგომარეობის შესახებ თამამად ისაუბრო. სპეციალისტი იმისთვის არსებობს, რომ მასთან გულწრფელები ვიყოთ და საჭირო დახმარება მივიღოთ.

გახსოვდეს, რომ გინეკოლოგს არ აქვს უფლება, შენი პირადი ცხოვრება და სექსუალური ურთიერთობები არასამედიცინო კუთხით განსაჯოს და ქორწინების გარეშე სექსის ან თუნდაც ამ სიტყვის ხსენების გამო გაგკიცხოს ან უხეშად მოგექცეს.

საკუთარი სხეულის შეცნობას და სურვილებთან გულწრფელობას ჰარმონიულ სექსუალურ ცხოვრებასთან მივყავართ. ქართული ონლაინ სექსშოპი Shop69.ge ერთ სივრცეში აერთიანებს სექსშოპს, სექსუალური განათლების შესახებ სტატიებს, ინტერაქტიულ ფორუმს და თემატურ ვლოგებს. ასე რომ, თუ საკუთარი სექსუალური ცხოვრების გამრავალფეროვნება მოგინდა, იცი, სადაც უნდა შეიხედო.