ნაციონალური მოძრაობის წევრის, ეკა ხერხეულიძის განცხადებით, მიხეილ სააკაშვილის სურვილი პოლიტიკურ საქმიანობაში სრულფასოვანი ჩართვაა. მისი თქმით, ახლა მთავარი საკითხი, ექსპრეზიდენტის გათავისუფლება დგას პოლიტიკურ დღის წესრიგში.

"მიხეილ სააკაშვილის საავადმყოფოში გადმოყვანა არ არის ის გზა, რისთვისაც მისი მცდელობა ქვეყანაში შემოსვლისას იყო გაცხადებული, მოგეხსენებათ, მისი სურვილია პოლიტიკურ საქმიანობაში სრულფასოვანი ჩართვა. მას არ აქვს არანაირი შესაძლებლობა, სასამართლოებზე მიმართოს ხალხს, არ აქვს შესაძლებლობა პირდაპირი ურთიერთობა ჰქონდეს საკუთარ ხალხთან.

აქედან გამომდინარე, მის მიმართ ნებისმიერი ადამიანის თანაგრძნობა, როდესაც ის კრიტიკულ ვითარებაში იყო, მე მესმის, რომ ეს იყო ჯანმრთელობის მდგომარეობა, მაგრამ ახლა დგება მთავარი საკითხი — მისი გათავისუფლების საკითხი. თავისთავად, პოლიტიკურ დღის წესრიგში დგას ეს საკითხი, ამ საკითხებზე ვისაუბრეთ", — აღნიშნა მან.

19 ნოემბერს იუსტიციის სამინისტრომ მიხეილ სააკაშვილს გორის სამხედრო ჰოსპიტალში გადაყვანა შესთავაზა, რასაც ექსპრეზიდენტი დათანხმდა და შიმშილობა შეწყვიტა.

სააკაშვილი 50 დღე შიმშილობდა. ადვოკატები, სამედიცინო სფეროს წარმომადგენლები, ომბუდსმენი, მხარდამჭერები, საერთაშორისო პარტნიორები მთავრობას მოუწოდებდნენ, ექსპრეზიდენტი სამოქალაქო კლინიკაში გადაეყვანა, თუმცა ამის ნაცვლად ის ძალის გამოყენებით გლდანის ციხის სამკურნალო დაწესებულებაში გადაიყვანეს. ამის გამო, პროტესტის ნიშნად, სააკაშვილმა სამედიცინო მომსახურებაზე უარი თქვა და მისი მდგომარეობა დამძიმდა, რის შემდეგაც მოწოდებები გადაყვანაზე გახშირდა, თუმცა ხელისუფლება უარზე იყო.

21 ნოემბერს ენდოკრინოლოგმა, ელენე გიორგაძემ განაცხადა, რომ სააკაშვილის მდგომარეობა სტაბილურია და ამ ეტაპზე გართულებები არ აქვს.

8 ნოემბრის შემდეგ, ნაციონალური მოძრაობა საპროტესტო აქციებს მართავდა. მათი მთავარი მოთხოვნა სააკაშვილის კლინიკაში გადაყვანა და მისი გათავისუფლება იყო. როგორც ენმ-ს თავმჯდომარე, ნიკა მელია ამბობდა, სანამ მათი მოთხოვნები არ შესრულდებოდა, დაშლას არ აპირებდნენ და აქციებს ყოველ დღე გამართავდნენ.

მას შემდეგ, რაც სააკაშვილი გორის სამხედრო ჰოსპიტალში გადაიყვანეს და შიმშილობა შეწყვიტა, ოპოზიციამ აქციები შეაჩერა. თუმცა მელია ამბობს, რომ "არაძალადობრივი მეთოდებით" ბრძოლა გაგრძელდება. მას არ დაუკონკრეტებია კონკრეტულად რა გეგმა აქვს ოპოზიციას, მაგრამ აღნიშნა, რომ მთავარი თავგადასავალი არის წინ და სანამ სააკაშვილი არ იქნება დახსნილი "უკანონო პატიმრობიდან" და სანამ ქართულ ოცნებას "სახელმწიფო ექნება მიტაცებული", ბრძოლას არ შეაჩერებენ.