ქართული ოცნება ისევ აცხადებს, რომ ექსპრეზიდენტ მიხეილ სააკაშვილის სამოქალაქო კლინიკაში გადასაყვანად პასუხისმგებლობას ვერ იღებს. პარტიის თავმჯდომარის, ირაკლი კობახიძის განცხადებით, სამოქალაქო საავადმყოფოში გადაყვანის შემთხვევაში უსაფრთხოების სერიოზულ რისკებს ხედავენ. მისივე თქმით, სააკაშვილის სამოქალაქო საავადმყოფოში გადაყვანა ახირებული მოთხოვნაა. კობახიძემ, ასევე, აღნიშნა, რომ ერთადერთი კლინიკა, რომელსაც მოშიმშილეების მკურნალობის გამოცდილება აქვს გლდანის ციხის საავადმყოფოა.

"რა თქმა უნდა, გვჯერა, რომ უწყებები, სამსახურები, სამართალდამცავი სტრუქტურები ყველაფერს გააკეთებენ იმისათვის, რომ ასეთი ტიპის გეგმები ვერ განხორციელდეს, მაგრამ რისკის ქვეშ დაყენება ადამიანის სიცოცხლისა და ჯანმრთელობის არის სერიოზული დილემა. აქედან გამომდინარე, ჩვენ ვერ ვიღებთ გადაწყვეტილებას სააკაშვილის სამოქალაქო კლინიკაში გადაყვანასთან დაკავშირებით. ერთი რომ, არ არსებობს ამის საჭიროება და მეორე, უსაფრთხოების რისკები არის ძალიან სერიოზული", — განაცხადა კობახიძემ.

ექსპრეზიდენტი მიხეილ სააკაშვილი, ამჟამად, გლდანის ციხის საავადმყოფოში იმყოფება. ის მისი და მისი ადვოკატების სურვილის საწინააღმდეგოდ გლდანის ციხის სამკურნალო დაწესებულებაში 8 ნოემბერს გადაიყვანეს. სააკაშვილი 48-ე დღეა შიმშილობს.

სააკაშვილი, მისი ადვოკატები და არასამთავრობო ორგანიზაციის წარმომადგენლები მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა.

სტრასბურგის სასამართლოს გადაწყვეტილების შემდეგ მან განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.